Ragnar Sverrisson, kaupmaður á Akureyri, gefur ekki mikið fyrir ákvörðun þeirra flokka sem eiga sæti í bæjarstjórn Akureyrar að starfa saman að stjórn bæjarins út kjörtímabilið.
Ákvörðun um þetta var tilkynnt í hádeginu og er markmiðið að mynda breiða samstöðu um stjórn sveitarfélagsins vegna sérstakra aðstæðna í rekstrinum. Fram að þessu höfðu Framsóknarflokkur, Samfylking og L-listi myndað meirihluta og voru þessir flokkar með sex manna meirihluta gegn fimm manna minnihluta Sjálfstæðisflokks, Miðflokks og VG.
Ragnar, sem er líklega í hópi þekktustu íbúa Akureyrar, segir í færslu á Facebook-síðu sinni:
„Þá hefur bæjarstjórnin okkar hér á Akureyri loks breyst í raunverulegan saumaklúbb þar sem forðast er að tala um stefnur og baráttumál flokka og framboða og framkvæmd þeirra. Þar með er pólitík endanlega úthýst á þeim bæ og tryggt að ekkert raski ró bæjarfulltrúa næstu misseri,“ segir Ragnar sem hefur boðið fram krafta sína fyrir Samfylkinguna á síðustu árum.
Ragnar segir að fréttir um þetta sæti ekki miklum tíðindum, „aðeins staðfesting á því sem ég og fleiri hafa sagt að Sjálfstæðisflokkurinn hér í bæ ræður því sem hann vill ráða. Gildir þá einu hvort hann er í meirihluta eða ekki - vilji hans drottnar yfir öllu eins og þó nokkur stórmál í bæjarstjórn undanfarna mánuði sanna,“ segir Ragnar.
Hann segir að sjálfstæðismenn gefi tóninn og forystulaus meirihlutinn hafi ekki kjark til annars en að spila með.
„Til þess að réttlæta þessa "þjóðstjórn" hefur veiran voðalega verið virkjuð og henni kennt um allt saman ásamt kjarasamningum sem allir vissu um. Ekki virðist gamla meirihlutanum hafa hugkvæmst að þenja út brjóstkassann og nýta þetta tækifæri til að hefja nýja og þróttmikla sókn til uppbyggingar í bænum eins og mörg önnur bæjarfélög gera. Nei, þess í stað þykir betra að hjúfra sig endanlega að íhaldinu og hlusta enn frekar eftir hvað það vill eða vill ekki. Það er svo fjarskalega notalegt.“
