Ragnar Þór Ingólfsson, formaður VR, vandar Gylfi Arnbjörnssyni, fyrrverandi forseta ASÍ, ekki kveðjurnar í pistli á Facebook. Tilefnið eru ummæli sem Gylfi lét frá sér í Morgunblaðinu í dag en þar gagnrýndi hann forystu verkalýðshreyfingarinnar hér á landi.
„Það er ekkert launungarmál að orðræðan er beinskeyttari og samskiptin líka. Það er heldur engin launung að ég gaf ekki kost á mér á sínum tíma þar sem ég taldi mig ekki geta staðið fyrir svona stefnu og framgöngu. Ég vildi nálgast hlutina öðruvísi og gerði það. Þetta kemur mér því ekkert á óvart,“ sagði Gylfi í Morgunblaðinu og átti þar við stöðuna á vinnumarkaði og deilur ASÍ og Samtaka atvinnulífsins.
Sjá einnig: Gylfi fær að heyra það: „Nú sést í hvaða bandalagi þessi maður var“
Ragnar svarar þessum ummælum Gylfa og segir að honum hugnist ekki orðræða Samtaka atvinnulífsins. Hann hnýtir svo í Gylfa í leiðinni og segir:
„Undir forystu Gylfa Arnbjörnssonar, og stuðningsmanna hans, skrapaði ASÍ botninn í trausti í íslensku samfélagi. Þetta var staðfest af könnunum sem ASÍ lét gera árum saman og haldið var frá baklandi hreyfingarinnar. Undir hans stjórn og hugmyndafræði, um samræmda láglaunastefnu, átti að taka samningsrétt stéttarfélaga og læsa inn í Þjóðhagsráði í gegnum hið svo nefnda Salek samkomulag. Salek samkomulagið sem stjórnendur fyrirtækja tala enn þann dag í dag sem hinn heilaga kaleik.“
Ragnar segir að eftir að ný forysta tók við í verkalýðshreyfingunni hafi dæmið snúist við. Baráttan fyrir bættum lífskjörum hafi hafist fyrir alvöru með „nýju og öflugu fólki sem var ekki tilbúið að sættast við gamlar hagfræðikenningar vinnumarkaðarins sem voru orðnar jafn úreltar og innihaldslausar og fjármálakerfisins,“ segir Ragnar og bætir við að traust almennings til ASÍ mælist nú í hæstu hæðum.
„Það er ekki bara ný forysta verkalýðsins heldur líka ný forysta SA. Forysta sem er einbeittari en áður í að halda kjörum niðri, hvað sem það kostar, og beita fyrir sér aðferðum, orðræðu og kenningum sem hafa verið afsannaðar með öllu, studdar ítarlegum alþjóðlegum rannsóknum á vinnumarkaði,“ segir Ragnar og bætir við að SA hafi gengið lengra gegn réttindum og lífskjörum vinnandi fólks en áður hefur þekkst. Samtökin hafi hvatt fyrirtæki til að brjóta lög og fara gegn leikreglum sem skrifaðar hafa verið um samskipti á vinnumarkaði.
„SA telur nú að almenningur kaupi þau rök að þeir vilji fresta nauðsynlegum kjarabótum til þeirra lægst launuðu til að verja störf. Kanntu annan betri! Samtökum atvinnulífsins hafa löngum verið skítsama um störfin og fólkið sem þau vinnur. Ekki hefur það viðhorf lagast með nýrri forystu SA svo mikið er víst,“ segir Ragnar meðal annars.
Hann segir að lokum að það valdi honum vonbrigðum að fyrrverandi forseti ASÍ skuli taka málstað SA.
„En kemur svo sem ekki á óvart þar sem erfitt var að greina á milli SA og ASÍ undir hans stjórn, og stuðningsmanna hans. Viðhorfið til fyrrum umbjóðenda og félaga hefur greinilega lítið breyst.“
Mér hugnast ekki orðræða Samtaka atvinnulífsins. Undir forystu Gylfa Arnbjörnssonar, og stuðningsmanna hans, skrapaði...
Posted by Ragnar Þór Ingólfsson on Þriðjudagur, 29. september 2020