Ragnar Þór Pétursson, formaður Kennarasambands Íslands, er allt annað en sáttur við fjölmiðlamanninn Hjörvar Hafliðason.
Eins og Hringbraut greindi frá í morgun lét Hjörvar vægast sagt vafasöm ummæli falla í hlaðvarpsþætti sínum, Dr. Football. Um var að ræða auglýsingainnslag fyrir nikótínkodda og sagði Hjörvar:
„Fékk þær sláandi fréttir að aðeins 40% grunnskólanema er að taka í vörina og við ætlum að bæta úr því fyrir árslok.“
Hjörvar hlaut nokkra gagnrýni í kjölfarið, meðal annars frá Aroni Gauta Laxdal, doktor í íþróttafræði sem sagði meðal annars:
„Maður eyðir öllum deginum í að efla lýðheilsu barna og á sama tíma eru svona vitleysingar að eitra huga komandi kynslóða fyrir nokkra þúsundkalla. Standard takk.“
Ragnar tekur undir þessa gagnrýni og segir á Facebook:
„Hjörvar Hafliðason var bara í alvöru að reka áróður fyrir því að grunnskólabörn taki í vörina og auglýsa um leið tiltekið efni. Þvílíkur erkibjánaskapur. Markmenn mega snerta boltann með höndunum svo þetta er varla því að kenna að hann hafi skallað of marga blauta bolta um ævina.“
Ekkert tóbak er í umræddum nikótínpúðum en vinsældir þeirra hafa aukist mjög hér á landi á kostnað íslenska neftóbaksins. Reglugerð um púðana er í vinnslu hjá heilbrigðisráðuneytinu sem mun taka til ýmissa þátta, svo sem innihaldslýsinga og hámarksmagns nikótíns í púðunum.
Lára G. Sigurðardóttir, læknir og doktor í lýðheilsuvísindum, varaði við púðunum í fyrrasumar og furðaði sig á því að þeir væru ekki flokkaðir sem lyf. Í samtali við RÚV lýsti hún áhyggjum sínum af því hve sterkir púðarnir eru, en sterkasta nikótíntyggjóið á markaði hér á landi inniheldur 4 milligrömm en í púðunum getur styrkleikinn verið margfaldur á við það og jafnvel banvænn fyrir ung börn.
Maður eyðir öllum deginum í að efla lýðheilsu barna, og á sama tíma eru svona vitleysingar að eitra huga komandi kynslóða fyrir nokkra þúsundkalla. Standard takk. pic.twitter.com/qeYZIkKLbU
— Dr. Aron Laxdal (@aronlaxdal) January 13, 2021