Ung kona sem kveðst vera í áhættuhópi vegna COVID-19 kveðst vera pirruð og reið eftir að hafa farið í verslun Bónus í Grafarvogi síðdegis í dag.
Konan skrifar færslu í Facebook-hóp íbúa í Grafarvogi þar sem hún segir farir sínar ekki sléttar og að allt of algengt sé að fólk virði ekki tveggja metra regluna þó að COVID-19 sé aftur farið að greinast í samfélaginu.
„Afsakið ruddaskapinn, en ég er bara virkilega pirruð og reið núna,“ segir konan sem spyr hvað það er við tveggja metra regluna sem fólk skilur ekki.
„Er þetta virkilega svona erfitt að skilja? Það er ekki farandi í Bónus hérna í Spönginni fyrir fólki, fólk virðir ENGIN fjarlægðarmörk, ég þurfti nánast að fara inn í hillurnar núna áðan svo ég gæti fengið einhverja minnstu fjarlægð frá öðru fólki. Ég er í áhættuhóp og það lá við að ég væri i einu feitu kvíðakasti allan þann tíma sem ég var þarna inni,“ segir konan í færslunni.
Færslan hefur fengið nokkuð mikil viðbrögð og eru margir sem taka undir. Þó eru aðrir sem benda á að sumar verslanir bjóði upp á heimsendingu, aðrar verslanir sé hægt að sækja á tímum þar sem ekki er mikið að gera og þá geti gagnast að vera með hanska og grímu til að tryggja eigið öryggi.
Margir taka undir með konunni og segjast upplifa það víða í samfélaginu að fólk virðir ekki tveggja metra regluna. „Ég einmitt upplifi það sama, finnst enginn vera að virða tvo metrana. Það liggur við að það sé stigið á hælana á manni,“ segir ein kona á meðan önnur bætir við að hún sé alltaf farin að bera grímu þegar farið er í matvöruverslanir.
Ein sem segist hafa farið í umrædda verslun síðdegis tekur undir að það hafi verið mikið að gera. „En mér fannst allir vera að passa sig og starfsfólkið til fyrirmyndar,“ segir hún.
Þá segist ein kona, sem starfar í framlínusveitinni ásamt eiginmanni sínum, velja Bónus á Korputorgi vegna stærðar verslunarinnar. Þar sé vel staðið að málum en vissulega sé hún leið yfir því tillitsleysi sem fólk virðist sýna. „Hef áhyggjur af því að þurfa að fara aftur í gallann,“ segir hún.
