Páll Guðmundsson, framkvæmdastjóri Ferðafélags Íslands, fer hlýjum orðum um vin sinn, John Snorra Sigurjónsson sem sneri ekki heim eftir för á næsthæsta fjall heims, K2, fyrr í þessum mánuði.
„John og Lína voru einstaklega flott hjón. Lína stórglæsileg, eldklár, einbeitt, harðdugleg og skemmtileg. John fjallmyndarlegur, með lokkana sína út um allt, brosið breitt og hláturinn smitandi. Og líka eldklár og duglegur, fjölhæfur og einhvern veginn gat allt sem hann tók sér fyrir hendur. Og sem hjón fullkomnuðu þau hvort annað og voru samstiga og samhent í öllum sínum verkefnum,“ segir hann í grein sem birtist á vef mbl.is í dag.
Páll segir að John Snorri hafi verið magnaður fjallgöngumaður og náttúrubarn með mikla aðlögunarhæfni. Hann hafi vakið aðdáun og undrun í heimi háfjallafólks og áunnið sér virðingu á skömmum tíma.
„John Snorri hafði á skömmum tíma klifið fjögur af 14 átta þúsund metra fjöllunum og stefndi á að klára þau öll. Auk þess hafði hann klifið fjölmörg önnur fræg fjöll, til að mynda Matterhorn þar sem hann skokkaði úr bænum Zermatt upp á hæsta tind á þessu fræga fjalli og til baka á rétt rúmum fjórum tímum.“
Páll bætir við að fyrir marga geti verið illskiljanlegt að leggja í leiðangur þann sem John Snorri lagði í; að komast á tind K2 að vetri til í einhverjum erfiðustu aðstæðum sem hægt er að hugsa sér á jörðinni.
„Og það er kannski bara allt í lagi. Maður þarf ekki að skilja allt. Maður þarf ekki endilega að hafa skoðanir á öllu. John var eina mínútu að útskýra fyrir mér að hann yrði að takast við á við þetta verkefni. Þetta var allt í beinunum í honum og blóðinu. Þetta var svo miklu meira en fjallabaktería sem sum okkar fá. Þetta var ástríða, köllun sem hann varð að svara,“ segir Páll og bætir við að John Snorri hefði vel getað orðið geimfari.
„Hann hefði ekki skorast undan því að að vera sendur í geimskutlu á móts við risastóran loftstein sem stefndi á jörðina. Hann hefði gert það til að bjarga mannkyninu ef hann hefði getað. Þannig hafði hann aðra sýn en við flest hin. Við hefðum legið uppi í sófa með fjarstýringuna af sjónvarpinu og fylgst með fréttum af geimskutlunni. En þótt John hafi kosið að takast á við áskoranir sem voru okkur hinum ómöguleg þá var hann fyrst og síðast elskandi eiginmaður, umhyggjusamur faðir og frábær vinur,“ segir Páll sem endar pistilinn á þessum orðum:
„Og nú er sagan þeirra orðin sagan hennar Línu. Ég er viss um að það verður góð og falleg saga. Og þó að John sé ekki lengur á meðal okkar í lifandi lífi, brosandi og geislandi glaður, þá varðveitum við í hjarta okkar minningar um sannkallaðan afreksmann en ekki síður einstakan mannvin og góða manneskju.“
Pistilinn má lesa í heild hér.
