Stjórn Geðlæknafélags Íslands (GÍ) lýsir yfir áhyggjum vegna uppsagna sálfræðinga hjá SÁÁ og yfirvofandi starfslokum Valgerðar Rúnarsdóttur yfirlæknis. Þetta kemur fram í ályktun frá Geðlæknafélagi Íslands vegna þeirra stöðu sem upp er kominn á Vogi og innan SÁÁ. Í yfirlýsingunni segir enn fremur sem Óttar Guðmundsson geðlæknir skrifar undir:
„Geðlæknafélag Íslands hefur fylgst með þeim jákvæðu breytingum sem orðið hafa á meðferðarstarfi SÁÁ á síðustu árum. Vægi sálfræðinga og annarra fagstétta hefur þróast í meðferðinni. Samstarf milli SÁÁ og geðþjónustu Landspítala hefur aukist til mikilla muna. Sálfræðiþjónusta við börn hefur vaxið svo og meðferð vegna ópíóíðfíknar. Sálfræðingar SÁÁ hafa verið leiðandi í menntun áfengis- og vímuefnaráðgjafa.
Geðlæknafélag Íslands telur því þessar uppsagnir illskiljanlegar þar sem meðferð vegna fíknisjúkdóma byggist á þverfaglegri nálgun.“
Þá segir einnig í ályktuninni:
„Starfsemi SÁÁ er mikilvæg grunnþjónusta og nauðsynlegt að tryggja að hún glati ekki faglegu gildi sínu. Fjárhagsvandi samtakanna verður ekki leystur með uppsögn örfárra mikilvægra starfsmanna. Stjórn GÍ skorar á stjórnendur SÁÁ að draga þessar uppsagnir til baka án tafar.
Fyrir hönd stjórnar Geðlæknafélags Íslands.“