Ríkisstjórnin virðist kolfallin og tveir sigurvegarar eru í kosningabaráttunni fyrir Alþingiskosningarnar á laugardaginn að mati Össurar Skarphéðinssonar fyrrverandi utanríkisráðherra. Það eru Samfylkingin og Framsóknarflokkur.
Í löngum pistli á Facebook-síðu sinni fer Össur yfir kosningabaráttuna. Hann segir allt hafa stefnt í að ríkisstjórnin héldi velli en nú sé öldin önnur.
„Í dag er staðan allt önnur. Ríkisstjórnin virðist kolfallin. Tveir helstu flokkar hennar, VG og Sjálfstæðisflokkur, eru að sigla inn í sögulega útreið, einkum Sjálfstæðismenn. Ef þeir standa uppi með 20-22 prósent er flokkurinn endanlega fallinn um þrjár deildir undir forystu Bjarna,“ segir Össur.
Litlaus og misheppnuð kosningabarátta VG
Að mati Össurar eru Vinstri grænir með „viðkunnanlegasta og vinsælasta forsætisráðherra vorra daga“ en hefur háð „litlausa og eina misheppnuðustu kosningabaráttu síðari tíma.“ Hann spyr hvar Katrín Jakobsdóttir forsætisráðherra og formaður VG sé. „Það er eins og hún hafi týnst í kosningabaráttunni.“
Hann segir viðbúið að VG og Sjálfstæðisflokkurinn verði fyrir áfalli á kosninganótt. Séu kannanir sannspáar muni hvorki Katrín né Bjarni hafa „nokkra innistæðu til að krefjast forystuhlutverks við myndun ríkisstjórnar.“
Það sé erfitt fyrir Katrínu að fara fram á að halda stól sínum, sem hafi nánast verið sjálfgefið við upphaf kosningabaráttunnar og hún gæti þá valið milli áframhaldandi stjórnar eða mið-vinstri stjórnar.
Össur segir allt hafa stefnt í að Sósíalistaflokkurinn yrðu senuþjófar kosningabaráttunnar en flokkurinn hafi dalað á síðastliðnum dögum. Þeir hafi þó gert út af við möguleika VG að halda sæti sínu sem forystuflokkur í ríkisstjórn.
Sósíalistar dala en Samfylking og Framsókn sækja í sig veðrið
Samkvæmt skoðanakönnun sem birtist í Fréttablaðinu í dag nær Gunnar Smári Egilsson ekki inn í Reykjavík. „Þá verða örlög flokksins á þingi hin sömu og í Reykjavíkurborg. Hann mun týnast og gufa upp og enginn muna að hann er á þingi, fremur en í borgarstjórn. Gunnar Smári er einfaldlega hjartað, lífið og sálin í flokknum.“
Sé litið til sigurvegara kosningabaráttunnar segir Össur það vera tvo flokka, Samfylking og Framsóknarflokkur. Samfylkingin hafi staðið fyrir vel útfærðri kosningabaráttu þar sem Kristrún Frostadóttir hafi komið fram á sjónarsviðið sem „mesta stjórnmálaefni sem fram hefur komið á þessari öld.“
Það sé til marks um áhrif hennar að hún sé „óverðskuldað ötuð auri dag út og inn af Skrímsladeild Sjálfstæðisflokksins sem er skíthrædd við atgervi Kristrúnar og augljóst framtíðarhlutverk.“ Staða Samfylkingarinnar sé nú að Logi Einarsson formaður „sé við vissar aðstæður í kastfæri við stjórnarráðið.“
Framsókn hefur háð flotta kosningabaráttu að mati Össurar og tekist að stíga út úr skugga hinna stjórnarflokkanna. Hann berjist nú við Samfylkinga um að verða næst stærsti flokkur landsins á eftir Sjálfstæðisflokki. Engum standi stuggur af því að Sigurður Ingi Jóhannsson formaður verði forsætisráðherra. Takist flokknum að koma Ásmundi Einari Daðasyni félagsmálaráðherra inn í Reykjavík fari hann á miklu flugi inn í komandi kjörtímabil.
„Sjálfstæðisflokkurinn er kominn fram yfir síðasta söludag“
„Á örstuttum tíma hefur því kosningabarátta – sem í stórum dráttum hefur verið innihaldsríkari og málefnalegri en um langt skeið – gjörbreytt stöðunni. Merkilegasta niðurstaðan er kannski sú, að Sjálfstæðisflokkurinn er kominn fram yfir síðasta söludag sem afgerandi forystuflokkur og ekkert sem bendir til að hann nái aftur fyrri stöðu. Reykvíska þróunin, þar sem Sjálfstæðisflokkurinn hefur breyst í “einn af hinum” virðist nú hafa yfirfærst á landsvísu,“ segir utanríkisráðherrann fyrrverandi.