Örn Árnason, leikari og skemmtikraftur, er búinn að fá sig fullsaddan af skemmdarverkum í sínu heimahverfi. Örn er búsettur í Breiðholti og skrifar hann færslu inn í Facebook-hóp íbúa þar sem hann birtir myndir af húsveggjum sem búið er að spreyja á.
Það er ljóst að þetta vandamál er ekki bara bundið við Breiðholtið því í öllum hverfum borgarinnar – þótt víðar væri leitað – má sjá samskonar skemmdarverk.
„Ósköp er maður þreyttur á þessu graffi öllu. Það verður að gera þessum töggurum það ljóst að þetta eru skemmdarverk,“ segir Örn og bætir við að þegar spreyjað er á steinaðar klæðningar sé ómögulegt að laga þær nema hreinlega kaupa nýja klæðningu.
„Og það kostar tugi ef ekki hundruð þúsunda. Málning kostar helling líka. Tökum nú höndum saman um að koma þessu í einhvern annan farveg en að úða út eignir fólks,“ segir Örn sem birtir nokkrar myndir máli sínu til stuðnings.
Færsla Arnar hefur vakið talsverða athygli og er óhætt að segja að allir taki undir. Einn bendir á að graff, eða vegglistaverk, eigi heima í undirgöngum og tekur Örn undir það. Það sé þó munur á „töggum“og „graffi“ sem Örn segir að geti verið töff hafi það einhverja merkingu.
