Ómar Ragnarsson, sem vart þarf að kynna fyrir lesendum, er áttræður í dag. Ómar er fæddur þann 16. september árið 1940. Í tilefni stórafmælisins hefur kveðjunum rignt yfir þennan einstaka mann sem segja má að sé sannkölluð þjóðargersemi.
Tónlistarmaðurinn Jón Ólafsson sendir Ómari fallega kveðju á Facebook í tilefni dagsins:
„Þúsundþjalasmiðurinn Ómar Þ. Ragnarsson er 80 ára í dag. Hann er ótrúlegur hæfileikamaður sem hefur barist fyrir verndun íslenskrar náttúru; gert heimildamyndir sem eiga sér fáar hliðstæður, samið texta sem þjóðin er löngu búin að festa í minni, gert lög af ýmsum gerðum (án þess að spila á hljóðfæri), fært okkur fréttir af mönnum og málefnum, skemmt kynslóðum um áratuga skeið með gamanefni og sprelli ýmiskonar og svona mætti lengi telja. Ómar er merkilegur maður sem á skilið vegtyllur, orður, athygli, hrós, klapp á bakið, koss á kinn, vinalegar kveðjur og þakkir fyrir sitt ómetanlega framlag. Til hamingju með daginn kæri. Ég bugta mig og beygi.“
Undir þetta taka margir þjóðþekktir einstaklingar. „Ég elska orkuna sem Ómar er - stöðugt á hreyfingu með fallegt hjartalag,“ segir Ellý Ármanns á meðan Skarphéðinn Guðmundsson, dagskrárstjóri RÚV, segir: „Það er og verður aðeins einn Ómar. Þjóðargersemi.“
Gunnar Þorsteinsson, oft kenndur við Krossinn, segir: „Þessi maður er þjóðargersemi og hann á afmæli í dag. Guð blessi Ómar Ragnarsson.“
Kristín Helga Gunnarsdóttir rithöfundur segir að Ómar sé sannkölluð fyrirmynd og náttúrukraftur.
„Fjöllistamaður og baráttumaður fyrir betri jörð - alltaf jákvæður og góðviljaður. Hann er glöggur maður með stóra sýn sem stöðugt spyr spurninga, rannsakar og uppgötvar. Það er mikill heiður að ganga með honum götuna. Og að vinna með honum í gamla daga á Stöð tvö var alltaf lærdómur og gleði. Við deilum dálæti á allskonar sniðugum jeppum og þá sérstaklega súkkum. Til hamingju með daginn þinn, kæri Ómar, og til hamingju með Dag náttúrunnar, allir! Gerum betur.“
