Lögregla var send að heimili fjögurra barna fjölskyldu í gær þar sem faðirinn átti erfitt með að fylgja reglum um einangrun í heimahúsi en að því er kemur fram í frétt RÚV um málið hafði maðurinn greinst með COVID-19 við sýnatöku í gær.
Samkvæmt tilkynningu frá lögreglunni á höfuðborgarsvæðinu voru aðrir íbúar heimilisins orðnir úrræðalausir og því hafi lögregla verið kölluð til. Maðurinn var vistaður í fangageymslu vegna málsins en Skúli Jónsson, aðstoðaryfirlögregluþjónn sagði í samtali við RÚV að lögregla hafi þurft að klæðast hlífðarfatnaði við handtökuna.
Fulltrúar frá Barnavernd fóru í kjölfarið á heimilið en maðurinn var fluttur með sjúkrabíl aftur á heimilið í dag eftir að hafa gist í fangaklefa í nótt. Reglur um einangrun í heimahúsi voru brýndar fyrir manninum og var klefinn sótthreinsaður eftir að maðurinn var fluttur.
Mál af þessu tagi eru fátíð að sögn Skúla en einstaka mál sem snúa að erfiðleikum við að virða reglur um einangrun hafa komið upp. „Það getur reynst fólki mjög erfitt að vera í einangrun í heimahúsi, þetta getur verið harmleikur fyrir fólk“ sagði Skúli í samtali við RÚV.
