Á þjóðhátíðardegi Íslendinga á fimmtudaginn var frumsýnd á bandarísku streymisveitunni Netflix ný íslensk sjónvarpssería eftir Baltasar Kormák sem ber heitið Katla. Fjölmargir hafa tjáð sig um seríuna og sitt sýnist hverjum að vanda. Gagnrýnandinn Jón Viðar hefur til að mynda gefið lítið fyrir Kötlu.
Ein þeirra sem gerir Kötlu að umtalsefni er Ólína Kjerúlf Þorvarðardóttir fræðikona og fyrrverandi þingmaður. Í pistli á Facebook-síðu sinni viðrar hún skoðanir sínar á þáttunum og segist hafa verið orðin „ansi stóreyg yfir þessu öllu saman,“ eftir þrjá þætti en segir þá hafa tekið að skána upp úr því. Hún sé þó sammála gagnrýni Jóns Viðars á inntak þáttanna.
„Sem betur fór kláraði ég alla röðina því að ég varð sáttari eftir því sem á leið. Varð samt aldrei alveg ánægð og satt að segja er ég ekki mjög impóneruð yfir atriðum eins og drekkingu sem sviðsett er með nærmynd undir vatni - sérstaklega ekki þegar litið er á persónuvalið í þessu tiltekna atriði. Atriði af þessum toga fara í mínar fínustu - ég ræð ekki við það - en ætla að stilla mig um að hafa frekari orð um þetta,“ skrifar Ólína.
Hún segir leikaranna í þáttunum hafa staðið sig með stakri prýði en tekur þó sérstaklega fram að Hlynur Harðarson hafi að öðrum ólöstuðum staðið upp úr. Umgjörðin og sviðsmyndin hafi sömuleiðis verið til fyrirmyndar sem var þó svolítið ýkt og það var að hennar mati „aðeins of mikil læti í tónlistinni þó.“
Ólína er þó nokkuð gagnrýnin á handrit þáttanna sem hún segir hafa verið stærsta veikleika þeirra. „Þetta rímaði einhvern veginn ekki við neitt, hvorki þjóðtrú né nýaldarfræði. En þetta er kannski bara smekksatriði og kann að vera ýmsu háð,“ skrifar hún.