„Þvílíkt og annað eins dáðleysi hefur ekki lengi sést í íslenskri pólitík,“ segir Ólína Þorvarðardóttir, fyrrverandi þingkona, um mál egypsku fjölskyldunnar sem til stendur að senda úr landi.
Óhætt er að segja að mál fjölskyldunnar hafi vakið hörð viðbrögð, enda fjögur börn í fjölskyldunni sem hafa komið sér vel fyrir á Íslandi. Ólína gagnrýnir Katrínu Jakobsdóttur forsætisráðherra og Ásmund Einar Daðason, félags- og barnamálaráðherra, sérstaklega í færslu sinni á Facebook.
„Þessu fólki er ekki treystandi fyrir neinu. Barnamálaráðherrann sem svo kallar sig, á harða flótta og felur sig eins og hugleysingi á bak við dómsmálaráðherrann. Forsætisráðherrann þvaðrar um almennar leikreglur þegar bænaraugu barnanna stara á hana. Bænaraugu barnanna sem eru hér NÚNA, en stjórnvöld ætla að reka úr landi í miðjum heimsfaraldri, á vit ótta og óöryggis, á vit hættunnar sem fjölskyldufaðirinn á yfir höfði sér.“
Að loknum ríkisstjórnarfundi í dag sagði Ásmundur Einar að málið væri á borði dómsmálaráðuneytisins. Í frétt Vísis í dag kom aftur á móti fram að Áslaug Arna Sigurbjörnsdóttir dómsmálaráðherra hefði neitað að tjá sig við fjölmiðla að fundi loknum. Þá sagði Katrín Jakobsdóttir, samkvæmt frétt Vísis, að hún beitti sér ekki í einstökum málum þegar málefni egypsku fjölskyldunnar bar á góma.
Ólína er harðorð í garð Ásmundar og Katrínar.
„Með þessu fólki vann ég þegar ég sat á þingi fyrir nokkrum árum. Ég hafði álit á þeim báðum. Það var þá. Ekki lengur. Þessu fólki mun ég aldrei treysta til nokkurs hlutar framar. Aldrei. Þau eru mannleysur.“