Ólafur Guðmundsson, varaborgarfulltrúi Sjálfstæðisflokksins, segist iðrast ummæla sem hann lét falla í tengslum við skotárás á bifreið Dags B. Eggertssonar borgarstjóra liðna helgi.
Líkt og fram hefur komið hefur færsla Ólafs vakið mikla athygli. „Byrjaðu á sjálfum þér...Hér er afleiðing af því sem hampað hefur verið frá svokalaða hruninu 2008. Nú er byltinginin komin heim og þú verður bara að taka því Hr. borgarstjóri,“ skrifar Ólafur í færslunni.
Hann segist iðrast ummælanna í viðtali við Fréttablaðið.is: „Við gerum öll mistök. Ég hef gert önnur mistök í lífinu og kem til með að gera mistök. Þú gerir mistök, Dagur gerir mistök. Þetta var ekki gert í neinum illvilja eða til að særa einn eða neinn.“
Ólafur segir að hann hafi ekki verið undir áhrifum áfengis þegar hann skrifaði færsluna í gærkvöldi:
„Ég var bara að fara að sofa. Þetta var það síðasta sem ég gerði áður en ég slökkti á tölvunni, að setja þetta inn í bríaríi og var búinn að gleyma þessu í morgun þegar ég vaknaði.“