Ólafur Stephensen, framkvæmdastjóri Félags atvinnurekenda, leggst mjög gegn tillögum starfshóps sem gætu gert það að verkum að verð á sætindum og sykruðum vörum hækki um 20% í verði.
Ólafur gerir þetta að umtalsefni í aðsendri grein í viðskiptablaði Morgunblaðsins í dag.
Hringbraut fjallaði nokkuð ítarlega um málið í síðustu viku en meðal þess sem hópurinn leggur til er að vörugjöld verði lögð á gos- og svaladrykki, íþrótta- og orkudrykki sem innihalda sítrónusýru, sælgæti, kex, kökur, sætabrauð og orku- og próteinstykki.
Sjá einnig: Vilhjálmur: Sætindi seljast vel á bensínstöðvum þó verðið sé hátt
Ólafur segir að einhverjir kynnu að halda að þarna sé um að ræða svokallaðan sykurskatt en þegar tillögurnar eru skoðaðar kemur í ljós að svo er ekki.
„Jú, skatturinn á að leggjast á sykraða gos- og svaladrykki, en líka sykurlausa drykki með sætuefnum og sódavatn, þ.e. ef það inniheldur sítrónusýru. Það er rökstutt með því að slíkir drykkir geti verið óhollir fyrir tennurnar. Skatturinn er þá líka tannverndarskattur. Samt á hann ekki að leggjast á náttúrulega ávaxtasafa, þrátt fyrir að Landlæknisembættið vari við óhóflegri neyzlu þeirra vegna mögulegra glerungsskemmda. Hann á heldur ekki að leggjast á dísætar mjólkurvörur. Í 100 ml af Coca Cola eru 10,6 grömm af sykri, en í jafnmiklu magni af engjaþykkni 13-16 grömm og kókómjólk 8,7 grömm. Hann á að leggjast á kex og sætabrauð, orkuog prótínstykki en ekki ýmsar aðrar sykraðar vörur, eins og til dæmis dísætt kakóduft til að búa til sykraða drykki. Þannig mætti áfram telja,“ segir Ólafur.
Sjá einnig: Sævar: Af hverju lækkum við ekki frekar verð á hollustuvörum?
Ólafur bendir enn fremur á að starfshópurinn vilji hækka virðisaukaskatt á „óhollum“ vörum eins og gosi en fella hann niður á grænmeti og ávöxtum.
„Afleiðingin yrði þrjú skattþrep virðisaukaskatts á matvöru, 0%, 11% og 24%. Þar að auki yrði lagt 20% vörugjald á sumar sykraðar vörur og sumar ósykraðar. Þetta yrði gífurlega flókið og ógegnsætt kerfi, sem myndi stórauka vinnu og kostnað jafnt verzlunarfyrirtækja og opinberra stofnana, sem ættu að sjá um álagningu skatta og eftirlit með henni. Tekin væri algjör u-beygja á vegferð undanfarinna ára í átt til einföldunar kerfis neyzluskatta og stefnan tekin djúpt inn í vörugjaldafrumskóginn á ný.“
Ólafur bendir á að núverandi tollskrá sé að mörgu leyti úrelt þrátt fyrir sín níu þúsund númer.
„Tillögur hópsins eru vondar og það sem er enn verra; ef þær komast í framkvæmd er búið að búa til fordæmi fyrir fleiri neyzlustýringarsköttum. Enginn hörgull er á matvælum sem eru óholl ef þeirra er neytt í óhófi. Við getum þá búizt við koffínskatti á te, kaffi og aðra koffíndrykki, transfituskatti á snakk og franskar, fituskatti á smjör og hangikjöt og þannig má lengi halda áfram. Ef við fetum áfram þessa braut verður skattlagning á mat frumskógur sem enginn ratar um. Væri kannski bara skynsamlegra að hafa skattkerfið einfalt en upplýsa og fræða fólk um hollustu matvara? Slíkt hefur til dæmis stuðlað að hröðum samdrætti í neyzlu á sykruðu gosi undanfarinn áratug, án neyzlustýringarskatts.“
