„Það er ekki til vinsælda fallið að gagnrýna Kára Stefánsson. Síst af öllu að atyrða hann fyrir að láta skapsmuni ráða við örlagaríkar ákvarðanir. Enda er Kári vinsæll og veit af því og minnir okkur reglulega á hvað Íslensk erfðagreining hefur varið mörgum milljörðum króna í viðbrögð við kórónuveirunni.“
Svo hefst pistill almannatengilsins Ólafs Haukssonar þar sem hann svarar viðbrögðum Kára við upphaflegum pistli sínum. Þar fullyrti Ólafur að „skapsveiflur forstjóra Íslenskrar erfðagreiningar“ hafi leitt til þess að stjórnvöld hættu að skima alla farþega sem kæmu til landsins.
Í svari sínu í gær hafnaði Kári því að fyrirtækið hafi „hlaupist á brott“ og sagði þau veirumynstur sem hafi greinst hér undanfarið bendi til að hún hafi ekki komið frá „öruggu“ ríki sem slapp við landamæraskimun.
„Það liggur fyrir að skapið í Kára réð för þegar hann tilkynnti með viku fyrirvara að hann væri hættur þátttöku í landamæraskimun ferðamanna,“ segir Ólafur í nýjasta pistli sínum sem birtist á Vísi.
Var þá haft eftir Kára að honum þætti stjórnvöld hafa sýnt sér virðingarleysi, samskiptin væru skringileg og að honum hafi liðið eins og boðflennu.
Bauð sjálfur í partíið
„Var eitthvað að þessum viðbrögðum? Mátti Kári ekki yfirgefa samkunduna þegar búið var að móðga hann nógu mikið?“ spyr Ólafur.
„Nei, það mátti hann ekki vegna þess að hann hafði sjálfur boðið í partíið. Þegar ákveðið var að hefja skimun ferðamanna treysti Landspítalinn sér til að skima 500 manns á dag. Kári steig þá fram og bauðst til að annast skimun 2.000 manna á dag á landamærunum.“
Slíkt hafi verið þegið með þökkum og áform ferðamanna til og frá landinu miðast við þessi afköst.
Í ljósi þessa hafi sýkla- og veirufræðideild farið á yfirsnúning á þeim vikufresti sem Kári gaf áður en fyrirtækið dró sig úr skimuninni.
„Íslensk erfðagreining aðstoðaði reyndar dyggilega við þann undirbúning. Samt var ljóst að þrátt fyrir góða viðleitni yrðu áætlanir þúsunda ferðamanna í uppnámi, það yrði algjört kaos og strandaglópar á flugvöllum víða um heim. Sú ákvörðun var því tekin af hálfu stjórnvalda að undanþiggja skimun fyrir ferðamenn frá fjórum löndum auk Færeyja og Grænlands.“
Með þeim hætti hafi verið hægt að standa við loforð Kára um fjöldann sem hann sagðist ætlað að skima áður en hann lét sig hverfa.
Óvíst hvort veiran hafi ekki komið frá öruggu ríki
„Ef hann hefði ekki bakkað út úr verkefninu, þá hefði áfram verið hægt að skima alla ferðamenn til landsins, eins og alltaf stóð til.“
Ólafur fullyrðir að þrátt fyrir yfirlýsingar Kára sé ekki hægt að vita hvort það hafi verið fólk frá öruggu löndunum sem hafi smitað út frá sér hér á landi, þar sem það fór ekki í skimun.
„Fólk frá mörgum öðrum löndum kom í gegnum þessi öruggu lönd, þar á meðal frá Austur-Evrópu. Við þyrftum ekki að búa við þetta óöryggi ef allir hefðu verið skimaðir eins og til stóð frá fyrsta degi.“
Ólafur bætir við að með þessu sé hann þó ekki að vanmeta mikilvægi þeirrar aðstoðar sem Íslensk erfðagreining hafi veitt fram að þessu.
„Ókeypis skimanir fyrirtækisins eru á heimsmælikvarða og vafalítið hefur það einhverja hagsmuni af söfnun þeirra upplýsinga sem þannig fást. Til lítils væri annars að standa í þessu veseni.“