Ólafsfirðingum verður boðið til kyrrðarstundar í Ólafsfjarðarkirkju í kvöld. Mörgum íbúum er brugðið vegna manndrápsmáls í bænum í nótt en þar var maður stunginn með eggvopni. Fjórir voru handteknir vegna málsins.
Stefanía Steinsdóttir, sóknarprestur kirkjunnar, segir við Fréttablaðið að þeir sem eiga um sárt að binda vegna málsins geti komið í kirkjuna og fengið að ræða við prest eða starfsfólk frá Rauða krossinum.
„Þetta er áfall fyrir samfélagið. Það er ekkert launungarmál,“ segir Stefanía en kyrrðarstundin hefst klukkan 20 í kvöld.
„Rannsókn málsins er á algjöru frumstigi og mikil vinna lögreglu framundan. Vegna rannsóknarhagsmuna er því ekki hægt að veita frekari upplýsingar um það að svo komnu. Ákvörðun um hvort farið verður fram á gæsluvarðhald yfir einhverjum sakborninganna verður tekin seinna í dag,“ sagði lögregla í tilkynningu í morgun.
