Ögmundur Jónasson, fyrrverandi ráðherra Vinstri grænna, vill sjá Ísland draga sig úr NATÓ þrátt fyrir þið á ófriðarástand sem ríkir í heiminum núna.
„Farið er að ræða það í alvöru að því er best verður skilið að Ísland verði tengt hernaðarbandalaginu NATÓ enn sterkari böndum en verið hefur og að í landinu verði jafnvel her með fasta viðveru. Þótti mörgum nóg um þá hernaðaruppbyggingu sem þegar hafði verið heimiluð af hálfu íslenskra stjórnvalda en nú skal enn bætt í svo um munar. Og sem táknrænan gjörning í tengslum við innrás Rússa í Úkraínu er svo að skilja að svokallað loftrýmiseftirlit flugherja NATÓ-ríkja frá íslenskum flugvöllum hafi verið aukið og þá væntanlega í þeim tilgangi að sýna hernaðarbandalagið hnykla vöðvana,“ skrifar Ögmundur í aðsendri grein í Fréttablaðinu.
„Ráðherrar í ríkisstjórninni draga hvergi af sér að lýsa yfir „þverpólitískri samstöðu“ með NATÓ og sýnir Vinstrihreyfingin – grænt framboð þann stuðning jafnt í orði sem á borði þótt enn sjáist þess ekki stað í stefnuskrám. Veruleikinn birtist í verkunum. Nóg um það að sinni að öðru leyti en því að benda á að hér er í reynd verið að hverfa frá grundvallar stefnumarkmiði Vinstri hreyfingarinnar – græns framboðs frá stofnun flokksins en þá var heitið afdráttarlausri andstöðu við veru Íslands í hernaðarbandalaginu NATÓ, hvað þá við hernaðaruppbyggingu á Íslandi, árásarþotur og setulið í landinu.“
Ögmundur rekur sögu kalda stríðsins og rifjar upp varnarorð Dwight D. Eisenhower, fyrrum forseta Bandaríkjanna, sem hann lét útúr sér í kveðjuræðu sinni sem forseti.
„Hann kvaddi þjóð sína að loknum forsetaferli sínum með orðum á þessa leið: Valdastofnanir samfélagsins þurfa að vera á verði gagnvart ásælni vopnaiðnaðar og hernaðarhagsmuna. Vald sem þaðan sprettur getur leitt til hrikalegra hörmunga og minnumst þess að áhrifin frá þessum öflum eru til staðar og verða til staðar.“
„Sú var tíðin að heimurinn, almenningur og flest ef ekki öll ríki heims, óttuðust kjarnorkuvopn í alvöru og höguðu sér samkvæmt því. Slökun á spennu var mál málanna og í kjölfarið takmörkun vígbúnaðar. Sá tími virðist vera liðinn,“ skrifar Ögmundur.
„Á Íslandi ættum við að sýna fordæmi, bægja öllum hernaðartólum frá landinu undir gamalli kröfu en að mínu mati sígildri: Ísland úr NATÓ, herinn burt!“ segir hann að lokum.