Óðinn Jónsson, fjölmiðlamaður og fyrrverandi fréttastjóri RÚV, veltir því fyrir sér hvers vegna rjúpnaveiði þetta árið verði ekki einfaldlega bönnuð.
Rjúpnaveiðitímabilið hefst á sunnudag og stendur það yfir til og með 30. nóvember, frá og með föstudögum til og með þriðjudögum. Umhverfisstofnun hefur hvatt veiðimenn til að gæta hófs í veiðum en einnig hvatt þá til að fylgja sóttvarnarreglum og tilmælum sem í gildi eru á hverjum tíma.
„Rjúpnastofninn hefur ekki verið veikari í 25 ár en Covid-faraldurinn er í vexti á landinu. Örvæntingarfullur eltingarleikur byssumanna upp um fjöll og firnindi um vetur er ekki einkamál þeirra. Af hverju er rjúpnaveiði ekki einfaldlega bönnuð?“ spyr Óðinn á Twitter.
Bent var á það á vef Umhverfisstofnunar fyrr í þessum mánuði að veiðistofninn nú sé með minnsta móti síðan mælingar hófust árið 1995. Hefur stofninn aðeins einu sinni verið metinn viðlíka lítill en það var árið 2002.
Rjúpnastofninn hefur ekki verið veikari í 25 ár en Covid-faraldurinn er í vexti á landinu. Örvæntingarfullur eltingarleikur byssumanna upp um fjöll og firnindi um vetur er ekki einkamál þeirra. Af hverju er rjúpnaveiði ekki einfaldlega bönnuð?
— ÓÐINN JÓNSSON (@OdinnJonsson) October 28, 2020