Sjálfstæðisflokkurinn fengi 23,5 prósent atkvæða ef gengið yrði til Alþingiskosninga í dag, samkvæmt nýrri könnun MMR. Flokkurinn bætir við sig fylgi frá síðustu könnun en þá var það 22,2 prósent.
944 einstaklingar, 18 ára og eldri, svöruðu könnun MMR sem framkvæmd var dagana 19. til 25. maí. Þátttakendur voru valdir úr Þjóðskrá þannig að þeir endurspegli lýðfræðilega samsetningu þjóðarinnar á hverjum tíma, segir á vef MMR um könnunina.
Athygli vekur að Píratar eru nú næststærsti flokkur landsins og mælist fylgi hans nú 14,6 prósent. Í síðustu könnun mældist það 11,6 prósent. Píratar fengu 9,2 prósenta fylgi í kosningunum 2017.
Fylgi Samfylkingarinnar mælist nú 13,3% en mældist 12,3% í síðustu könnun. Fylgi Viðreisnar mælist nú 11,3% og mældist 12,2% í síðustu könnun. Fylgi Miðflokksins mælist nú 10,8% og mældist 9,7% í síðustu könnun.
Þá vekur lágt fylgi Vinstri grænna athygli en flokkurinn mælist nú með 10,6 prósenta fylgi en var 11,6 prósent í síðustu könnun. Í kosningunum 2017 fékk VG 16,9 prósent atkvæða.
Fylgi Framsóknarflokksins mælist nú 6,4% og mældist 9,4% í síðustu könnun. Fylgi Sósíalistaflokks Íslands mælist nú 4,1% og mældist 4,3% í síðustu könnun. Fylgi Flokks fólksins mælist nú 3,6% og mældist 3,9% í síðustu könnun. Flokkur fólksins fékk 6,9 prósent atkvæða í kosningunum 2017 og fjóra þingmenn kjörna.
Stuðningur við aðra flokka eða framboð mældist 1,8% samanlagt.
Þá sögðust 47,5 prósent svarenda styðja ríkisstjórnina, en í síðustu könnun, sem birt var 8. Maí, var stuðningurinn 54,2 prósent.
