„Ég varð vitni að því þegar upp komst um þjófnað í matvöruverslun í dag. Það er allt of mikið til af öllu en samt er neyðin svo mikil á sumum heimilum að fólk sér enga aðra leið.“
Þetta segir Nína Richter, ljósmyndari og rithöfundur, í færslu á Twitter-síðu sinni í dag sem vakið hefur mikla athygli. Eins og Nína greinir frá varð hún vitni að þjófnaði í dag. Nína segir að svo virðist vera sem neyðin hjá sumum sé það mikil að þeir sjá þann eina kost að hnupla.
„Við eigum flest allt of mikið af öllu og þetta kerfi er gersamlega glatað. Mér er illt í hjartanu,“ segir hún og heldur áfram:
„Lögreglan var á leiðinni og ég var farin áður en hún kom. Ég þekki þetta tiltekna mál ekki til hlítar og er hvorki lög- né hagfræðingur en það hlýtur að vera hægt að útfæra lögin þannig að fátækt fólk í svona ömurlegri neyð þurfi ekki að óttast refsingu. Fólk sem á ekki mat,“ segir Nína og bætir við að fólk geti brugðist við og hjálpað þeim sem eru í neyð.
„Þið getið brugðist við og styrkt Mæðrastyrksnefnd og Fjölskylduhjálp Íslands með ýmsum hætti. Covid er vafalítið þungur róður fyrir þá sem áttu erfitt fyrir. Matur, peningar og föt sem þið eigið aflögu getur komið að góðum notum.“
Ég varð vitni að því þegar upp komst um þjófnað í matvöruverslun í dag. Það er allt of mikið til af öllu en samt er neyðin svo mikil á sumum heimilum að fólk sér enga aðra leið. Við eigum flest allt of mikið af öllu og þetta kerfi er gersamlega glatað. Mér er illt í hjartanu. 1/2
— Nína Richter (@Kisumamma) October 13, 2020
