„Það er vanalega talað um það á mannamótum á Íslandi að landsmenn státi af besta heilbrigðiskerfi í heimi, en eftir að hafa búið átta ár í Þýskalandi get ég ekki annað en hlegið að þeirri staðhæfingu,“ segir Gauti Kristmannsson, prófessor í þýðingarfræðum við Háskóla Íslands, en faðir hans, Kristmann Eiðsson var eitt af 12 fórnarlömbum hópsýkingarinnar á Landakoti á síðustu vikum.
Gauti segir föður sinn hafa kvatt það fljótt, aðeins 30 tímum eftir að hann greindist smitaður, að synir hans fjórir hafi ekki haft tækifæri til að kveðja hann á spítalanum. Hann ber starfsfólki Landakots góða sögu, en það hafi veitt þeim tækifæri til að kveðja föður sinn á Landakoti fyrir kistulagninguna, sem hafi reynst þeim afar mikilvægt, því í sjálfri kistulagningunni hafi verið búið að loka kistunni sakir aðstæðna.
Gauti, sem er gestur fréttaþáttarins 21 á Hringbraut í kvöld, kveðst gáttaður á því við hvaða aðstæður starfsfólk heilbrigðiskerfisins hér á landi starfi; skortur á mannskap, aðbúnaði, tækjum, viðhaldi og uppbyggingu hafi staðið þessari lykilþjónustu fyrir þrifum svo áratugum skipti; langvarandi mygluskemmdir og léleg eða engin loftræsting sé jafnvel látin átölulaust – og hann vill meina að kerfislægt fjársveltið í þessum geira megi rekja til stjórnmálanna sem séu sérlega svifasein þegar að þessum lífsnauðsynlega málaflokki komi.
„Krafan er niðurskurður á niðurskurð ofan – og helst sú að lækka skatta enn frekar svo minna verði til samneyslunnar – og það þvert á margítrekaðan vilja þjóðarinnar eins og endurtekið hefur komið fram í skoðanakönnunum á síðustu árum.“
Kristmann Eiðsson, faðir Gauta, var 84 ára þegar hann lést, nýkominn með pláss á hjúkrunarheimili. Kristmann var mikilvirkur og orðhagur þýðandi alla sína starfsævi og þekktur á því sviði fyrir vinnu sína í sjónvarpi.