Á þriðjudaginn birtist á mbl.is grein um brauðtertuuppskrift Sigmundar Davíðs Gunnlaugssonar formanns Miðflokksins undir fyrirsögninni „Brauðterta Sigmundar Davíðs slær öll met“.
„Hér gefur að líta svokallaða keppnis-brauðtertu sem erfitt verður að toppa og ekki spillir fyrir að hún er úr smiðju Sigmundar Davíðs Gunnlaugssonar, formanns Miðflokksins.“
„Miðflokksbrauðtertan greinir sig frá öllum öðrum brauðtertum að því leyti að hún er ljúffengari en allar aðrar sinnar tegundar og inniheldur meira af öllu. Það má nota innihaldsefni sömu ættar frá öðrum stöðum, en sá böggull fylgir því skammrifi að þá er verið að sætta sig við það næstbesta.“
Matargúrúinn Nanna Rögnvaldardóttir deilir þessu á Facebook með orðunum: Eitthvað finnst mér þessi brauðtertuuppskrift hans SDG kunnugleg. Nema ekki skreytingin.
Hún lætur fylgja með hlekk á eigin brauðtertuuppskrift sem virðist ansi svipuð brauðtertu Sigmundar Davíðs.
„Þetta er greinilega þín uppskrift, krydduð með afskaplega lélegu gríni. Lélegt að geta ekki upprunans,“ segir í einum ummælum við færslu Nönnu sem svarar: Bara það sem maður býst við úr þeirri áttinni.
„Svona rétt eins og þegar gamla laufabrauðsuppskriftin hennar mömmu var allt í einu orðin Paul Hollywood's Leaf Bread,“ en Hollywood er dómari í hinum geysivinsælu þáttum The Great British Bake Off.