Lögreglan á höfuðborgarsvæðinu birti meðfylgjandi mynd á Facebook-síðu sinni og er líklega óhætt að gefa ökumanninum bjartsýnisverðlaun vikunnar að þessu sinni.
„Það er gott að vera bjartsýnn, en maður má samt ekki ætla sér um of,“ segir lögreglan í færslu á Facebook-síðu sinni.
Svo virðist vera sem umræddur ökumaður hafi verið að sækja sér timbur. Hann gerði þó heldur litlar ráðstafanir til að flytja timbrið á öruggan hátt og skellti því bara inn um skottið. Ekki þarf að fjölyrða um heldur óvarlega var gengið frá farminum eins og lögregla bendir á.
„Enda ráku víst margir upp stór augu þegar þessi ökumaður var á ferðinni í umferðinni á dögunum. Svo fór reyndar líka að hann var stöðvaður, en ökumanninum var þá gert að flytja timbrið á áfangastað með öðrum og öruggari hætti.“
