Gunnar Smári Egilsson, formaður Sósíalistataflokksins og fjölmiðlamaður til fjölda ára, hefur lýst yfir áhyggjum af stöðunni á RÚV eftir brotthvarf fréttamannsins Helga Seljan sem kemur í kjölfarið á brotthvarfi fjölda öflugra fréttamanna frá RÚV.
Gunnar Smári beindi orðum sínum að Merði Árnasyni, sem setið hefur í útvarpsráði í áraraðir, og spurði hvort útvarpsráð ætlaði ekki að halda neyðarfund. Mörður svaraði:
„Varla neyðarfund. Hann er að skipta um vinnu, hvort e-ð er á bak við það annað en álag og leiðindi af hálfu Samherja veit ég ekki. Yfirmenn á RÚV hafa varið Helga í þeim árásum.“
Athygli vekur að Lára Ómarsdóttir, sem hefur einnig yfirgefið Kveik, svaraði honum einfaldlega með: „??“
Mörður sagði þá: „Ja, þú veist örugglega eitthvað sem ég veit ekki.“
Mörður Áslaugarson, sem situr einnig í útvarpsráði, sagði einnig að það yrði ekki neyðarfundur: „Ekki neyðarfund en vissulega umræðu.“
