„Hún varð amma frekar ung, var ekki orðin fertug. Ég sagði alltaf: Vá ég trúi ekki að þú sért amma, þú ert fallegasta amma sem ég veit um,“ segir Gestný Rós Guðrúnardóttir.
Gestný minntist systur sinnar, Maríu Óskar, sem fannst látin þann 3. júlí síðastliðinn, með hlýju í hjarta í samtali við Fréttablaðið í gærkvöldi. Gestný hefur stofnað styrktarreikning til að hjálpa börnum Maríu með útfararkostnað, en hún lætur eftir sig fjögur börn á aldrinum 12 til 26 ára og tvö barnabörn.
„Mér leið líka alltaf eins og hún væri bara mín önnur mamma. Alveg fram á unglingsár og mér líður stundum þannig ennþá. Ég leit oft á börnin hennar sem systkinin mín því ég var nær þeim í aldri,“ sagði Gestný við Fréttablaðið en María eignaðist dóttur sína þegar hún var 17 ára og svo eignaðist dóttir hennar dóttur sína einnig þegar hún var 17 ára.
Í samtali við Fréttablaðið sagði Gestný að María hafi verið handlagin og elskað að prjóna. Hún var mikill fagurkeri og með sinn eigin stíl og var alltaf hlýlegt á heimili hennar.
„Allir segja: Mæja er svo skemmtileg! Það er ekki hægt að lýsa henni öðruvísi. Hún er bara svo skemmtileg og var alltaf með svo áhugaverðar hugmyndir. Hún fór oft í útilegur með börnunum og eldaði besta mat í heimi. Hún var fyrst og fremst mamma og elskaði börnin sín af öllu hjarta. Hún var dásamleg manneskja.“
Þeim sem vilja styrkja ástvini Maríu Óskar er bent á þennan styrktarreikning:
Kennitala: 130487-3009
Reikningur 0370-26-018860
