Víðir Reynisson yfirlögregluþjónn segir að Almannavarnir hafi vissulega áhyggjur af hópmyndun á þeim veitingastöðum sem verða opnir um helgina. Eins og greint var frá í dag verður skemmtistöðum lokað tímabundið um helgina þar sem COVID-19-tilfellum hefur fjölgað nokkuð.
Víðir fór yfir stöðuna í samtali við Fréttablaðið.
„En það sem við erum kannski að segja líka er það, hvort það sé ekki bara skynsamlegt fyrir hvern og einn einstakling að hafa sig hægan um helgina, allt í lagi kannski að fara að fá sér að borða og fara svo heim aftur en að djammið taki sér kannski hlé um helgina á meðan við erum að ná utan um þetta,“ hefur Fréttablaðið eftir honum.
Víðir segir að ef horft er á fjölda smita nú miðað við fyrstu bylgju faraldursins sé full ástæða til að hafa áhyggjur. Staðan sé kannski alveg sambærileg þar sem verið er að skima mjög fjölmennan hóp sem er útsettur fyrir smiti. Margir séu með einkenni og töluverðar líkur á að smit sé útbreitt.
„Þess vegna viljum við beina þeim tilmælum til allra að þeir slaki á um helgina og láti lítið fyrir sér fara,“ segir Víðir.