„EF SETT ERU LÖG Á VERKFÖLL EINNAR STÉTTAR- ER GRAFIÐ UNDAN VERKFALLSRÉTTI ANNARRA STÉTTA.“
Þetta skrifar Rósa Björk Brynjólfsdóttir, óháður þingmaður og fyrrverandi þingmaður VG, á Facebook vegna atkvæðagreiðslunnar á Alþingi í gærkvöldi þar sem samþykkt var að setja lög á verkfall flugvirkja Landhelgisgæslunnar.
Hún bendir á að gul viðvörun hafi verið hangandi yfir þjóðinni þegar ákvörðunin var tekin.
„En að lagasetningin í gærkvöldi hafi snúist eingöngu um öryggi, er að mínu mati ekki rétt. Í öllu tali sínu um öryggi, þá hefði dómsmálaráðherra átt að huga betur að því síðastliðna mánuði.
Með því að stuðla að lausn og hvetja deiluaðila áfram. Deilan við flugvirkja hefur staðið yfir í 10 mánuði og 6 af 18 flugvirkjum hafa verið í verkfalli síðan 5. nóvember.
Ráðherrann hefur því haft langan tíma til að tryggja öryggið sem henni er tíðrætt um og forðast að koma fram með lög með engum fyrirvara til að stöðva verkfall vinnandi stéttar,“ skrifar Rósa.
Döpur og vonsvikin
Rósa bendir á að kveðið sé á um verkfallsréttinn í Mannréttindasáttmála Evrópu. Alþjóðavinnumálstofnun hafi barist gegn því að ríkisstjórnir taki réttinn af fólki með lagasetningu.
„Og ég var döpur og vonsvikin að sjá að ofan í vinnu þingsins og atkvæðagreiðsluna í gærkvöldi, steig forsætisráðherra fram í fjölmiðlum og boðaði mikil tíðindi í vinnumarkaðsmálum. Sem er að veita ríkissáttasemjara ríkari rétt til að stöðva verkföll. Þannig að veikja á aðkomu þingsins í þessu ferli og fela einum manni verkfallsstöðvun. Forseti ASÍ mótmælti líka harðlega á samfélagsmiðlum þessum hugmyndum forsætisráðherra.
Verkfallsrétturinn er sterkasta vopn vinnandi fólks til að berjast fyrir kjörum sínum, réttur sem er notaður ef allt annað þrýtur. Við eigum að forðast í allra lengstu lög að skerða þann rétt með því að setja lagasetningar á þennan rétt, yfirvöld eiga að stuðla að því með öllu afli að samningar náist.
Það er nefnilega svo að ef það eru sett lög á verkfallsréttar einnar stéttar, er í raun verið að grafa undan verkfallsrétti annarra stétta. Því kaus ég gegn lögum á verkfall flugvirkja.“