Margrét Friðriksdóttir, frumkvöðlafræðingur og einn af stjórnendum Stjórnmálaspjallsins á Facebook, varpaði áhugaverðri spurningu fram í Hundasamfélaginu í gær. Veltir hún því fyrir sér hvort það geti verið að Birta, sjö ára tík Margrétar sem er af tegundinni Chihuahua, geti verið samkynhneigð.
„Hér kemur ein undarleg spurning, en ég er að velta fyrir mér hvort hundar geti verið samkynhneigðir og einhver hér hafi reynslu af því? En þannig er mál með vexti að hundastelpan mín hún Birta virðist hafa 0% áhuga á karlkyninu og er ég búin að reyna para hana með mörgum flottum hundum síðan hún var 3 ára en hún verður 7 ára í sumar og ekkert gengið. Hún er til í að leika við þá í smástund en svo þegar þeir reyna eitthvað verður hún mjög reið og bítur þá frá sér. En svo á ég vin sem er með aðra Chihuahua tík og Birta mín virðist ástfangin af henni og fer alltaf að leika strák og riðlast aftan á henni og verður mjög ástsjúk að virðist. Er eiginlega búin á gefast upp á að reyna að para hana enda fer það að verða og seint og ég get ekki sett hana í tæknifrjóvgun þar sem hún hefur ekki eignast hvolpa náttúrlega, kannast einhver við þetta?“
Fjölmargir hafa skrifað athugasemdir við færsluna. Á meðan sumir segjast efast um að hundar geti verið samkynhneigðir virðast fleiri á þeirri skoðun að þeir geti sannarlega verið þar.
„Við áttum rakka sem var alveg klárlega samkynhneigður. Reyndum einu sinni að para hann en ekki séns. Hann hafði engan áhuga en riðlaðist á öllum rökkum sem hann hitti. Ég á bágt með að trúa því að hundar geti ekki verið samkynhneigðir,“ segir til dæmis ein.
Vísindavefurinn fjallar um samkynhneigð í dýraríkinu og í svari Jóns Más Halldórssonar líffræðings kemur fram að fræðimönnum greini mjög á hvort samkynhneigð sé til á meðal dýra. Því sé í raun ekki hægt að svara spurningunni játandi eða neitandi. Jón Már vísar meðal annars í líffræðinginn Dr. Bruce Bagemihl sem hefur sagt að ástaratlot mætti tengja við samkynhneigð hjá um 450 tegundum dýra.
„Bagemihl heldur því fram að samkynhneigð sé mjög algeng í dýraríkinu og í raun sé aðeins ein dýrategund til sem hafi eitthvað við hana að athuga og það sé maðurinn,“ segir í svarinu. Jón bendir hins vegar á að margir vísindamenn hafi gagnrýnt þessar niðurstöður og efast um þær.
