Margrét Friðriksdóttir greinir frá því á Facebook síðu sinni að hún hafi sent inn kvörtun til fjölmiðlanefndar vegna umfjöllun Stundarinnar á máli tengt Semu Erlu Serdar en líkt og áður hefur verið greint frá kærði Sema Margréti fyrir líkamsárás og hótanir fyrir tveimur árum eftir atvik sem kom upp fyrir utan veitingastaðinn Benzin um verslunarmannahelgina árið 2018.
Margrét viðurkenndi eftir atvikið að hún hafi ýtt við Semu og kallað hana illa innrætta manneskju eftir að hún var beðin um að yfirgefa staðinn vegna Semu. Hún greindi frá því í kjölfarið að hún hafi beðið Semu afsökunar vegna málsins en Sema ákvað engu að síður að kæra.
Síðastliðna verslunarmannahelgi birti Sema síðan færslu þar sem hún sagði ekkert hafa heyrt frá lögreglu um málið og að fyrirspurn hennar um stöðu málsins væri ekki svarað. Í færslunni segir Sema að um hafi verið að ræða hatursglæp og að lögregla þyrfti að gera betur í að vernda þolendur slíkra glæpa.
Stundin fjallaði daginn eftir um færsluna og segir Margrét að miðillinn hafa „markvisst stundað áróður gagnvart mér sem persónu í nokkur ár,“ og að þau hafi fjallað einhliða um málið tengt Semu. „Þrátt fyrir beiðni þá hafa þeir aldrei birt mína hlið á málinu, slíkir starfsættir blaðamanna og miðla er brot á fjölmiðlalögum,“ segir Margrét og vísar til 26. greinar laga um fjölmiðla.
„Í lýðræðislegu samfélagi tel ég ólýðandi að íslenskur miðill stundi jafn óvandaða og hlutdrægna blaðamennsku sem lútar að því að rógbera og mannorðsmyrða fólk með miðilinn að vopni og neita að birta alla málavexti eða gefa færi á andsvari, þarna tel ég miðilinn ekki einungis brjóta fjölmiðlalög heldur einnig siðarreglur blaðamanna,“ segir Margrét enn fremur.
Með færslunni fylgir skjáskot af tölvupósti Margrétar til ritstjórnar Stundarinnar frá 5. ágúst þar sem hún hvetur miðilinn til að fjalla einnig um sína hlið málsins en að sögn Margrétar hefur þeim pósti ekki enn verið svarað.
