Mannréttindadómstóll Evrópu hefur lagt blessun sína yfir lög í Tékklandi sem skylda foreldra til að láta bólusetja börn sín áður en þau fara í leikskóla. Þetta er niðurstaða Yfirdeildar Mannréttindadómstóls Evrópu í máli tékkneskra barna og foreldra þeirra, en þau fengu ýmist sekt eða var meinaður aðgangur að leikskólum vegna þess að börnin voru ekki bólusett.
Fréttablaðið fjallaði um málið í dag en í dómi sem kveðinn var upp í morgun af yfirdeild Mannréttindadómstólsins er því slegið föstu að umrædd bólusetningarskylda skerði réttinn til einkalífs. Dómurinn fellst hins vegar á að víðtæk bólusetning í samfélögum geti verið nauðsynleg í lýðræðissamfélagi. Það sé lögmætt markmið að tryggja hjarðónæmi til að veita viðkvæmum einstaklingum vernd gegn því að faraldur blossi upp sem þeim steðji hætta af. Umrædd skerðing á mannréttindum sem bólusetningaskyldan er, telst því að mati dómsins réttlætanleg og fer ekki gegn ákvæðum Mannréttindasáttmála Evrópu.
Vikið úr skóla fyrir að vera óbólusett
Í einu þeirra fimm mála sem fóru fyrir Mannréttindadómstólinn var um að ræða fjölskyldu sem neitaði að láta bólusetja dóttur sína með bóluefni gegn mislingum, hettusótt og rauðum hundum. Stúlkan fór í leikskóla árið 2006 en var vikið úr honum tveimur árum seinna er heimilislæknir lét skólameistarann vita að barnið væri óbólusett.
Foreldrar hennar kærðu málið til tékkneskra dómstóla sem dæmdi þeim í óhag með þeim röksemdum að fengi stúlkan að fara í skólann óbólusett væri samnemendum hennar stefnt í hættu. Í hinum málunum höfðu börn ekki fengið leikskólapláss og einn faðir var sektaður fyrir að hafa ekki látið bólusetja börn sín að fullu.
Fleiri ríki Evrópusambandsins hafa lögfest skyldu foreldra til að láta bólusetja börn sín, til að mynda Þýskaland, Frakkland og Ítalía.