Magnús segir hvernig er best að missa 5 til 10 kg í sumar: „Margar skyndi­lausnir virka ekki. Hvað er það þá sem virkar?“

Magnús Jóhann Hjartar­son, einka­þjálfari og sál­fræði­nemi, fór yfir góð ráð til að bæta matar­æðið í nýjum pistli á Vísi í dag.

„Jæja, hvað á ég að gera til að missa þessi 5 eða 10 kg í sumar? Á ég að prófa ketó, vegan, macros, low carb eða fasta bara alla daga? Þessar spurningar þekkja flestir og hafa í góðri trú, með ein­beittum á­setningi prófað margar skyndi­lausnir sem virka ekki. Af hverju virka þær ekki?“ skrifar Magnús.

„Fyrst er að nefna að enda­lausar upp­lýsingar um hvaða matar­æði sé rétt fyrir þig og aug­lýsingar um rétta kúrinn dynja lát­laust á okkur. Í öðru lagi er hver og einn ein­stak­lingur mis­munandi og því hentar ekki eitt fyrir alla. Mikil­vægast er svo að endur­orða spurninguna um að missa kíló og hugsa frekar um heil­brigðan líkama. Hvernig get ég misst þessi kíló og haldið þeim af mér það sem eftir er ævinnar? Lykil­at­riðið er hvað þú borðar og í hvaða magni.“

„Mikil­vægt er að horfa á heildar myndina varðandi næringu og hollan lífs­stíl. Hvað er það þá sem virkar?“ heldur Magnús á­fram.

Magnús segir að það að minnka magn sykurs og kol­vetna sem eru oft dul­búinn í fæðu okkar, sleppa alveg unnum mat og reyna að minnka matar­skammtinn og þannig koma í veg fyrir ofát.

„Það vita flestir að sykur og ofát er ekki gott fyrir þig en af­hverju eru unninn matur og græn­metis­olíur svona vondar? Unninn matur er í fyrsta lagi ekki náttúru­legur og líkami okkar er ekki gerður til að vinna úr efnunum sem eru í þeim mat. Þar koma græn­metis­olíur inn því þær felast í næstum öllum unnum mat. Þær heita mis­munandi nöfum eins og repju­olía, sól­blóma­olía og ca­nola olía. Á­stæða þess að græn­metis­olíur eru slæmar er vegna fram­leiðslu að­ferða við að búa til þessar olíur og hvað þær eru ó­stöðugar í olíu­formi. Við það ferli að hita, þurrka og sótt­hreinsa þessar olíur breytast þær og verða að efni sem oft eru eitruð og skað­leg fyrir líkama okkar. Þær eru oft notaðar við elda­mennsku og eru í flestum skyndi­bitum. Á­stæðan fyrir því að þetta er leyft í matnum okkar er um­ræða fyrir annan pistil. Það sem er hægt að nota í staðinn er t.d kald­pressuð ó­lífu­olía, kald­pressaða avo­ca­do olíu eða ó­saltað smjör­líki.“

„Annað er þegar þú færð þér að borða þá áttu að borða þangað til að þú verður saddur eða södd og er það tölu­vert auð­veldara ef þú borðar holla fæðu sem inni­heldur ekki sykur eða græn­metis­olíur. Því eitt af því sem þessi efni gera er að ýta undir ofát. Þriðja er svo að borða mat sem þér finnst góður og bragðast vel vegna þess að þú ert að fara halda á­fram að borða þann mat. Þar komum við að vanda­máli sem margir kvarta yfir. Er það sú hug­mynd sem sumir hafa í kollinum að hollur matur bragðist ekki vel. Unnin matur er oft bragð­bættur með sykri og öðrum á­vana­bindandi efnum sem veldur því að hreinn matur og hollur bragðast ekki eins. Því leitar fólk ekki í hann. Þar með sagt ef þú venur þig á að sleppa unnum mat og sykri í á­kveðinn tíma þá fer holli maturinn að bragðast betur.“

„Til að taka saman þá er gríðar­lega mikil­vægt að skil­greina matar­venjur þínar og auka með­vitund á sam­bandi þínu við mat. Það getur þú gert með því að spyrja þig ein­faldra spurninga; er ég að hlusta á líkamann minn, hvernig líður mér eftir hverja mál­tíð, er ég að hugsa um heilsuna þegar ég borða þessa mál­tíð? Síðan að minnka unninn mat, sykur og græn­metis­olíur og get ég lofað því að líkaminn mun vera þakk­látur fyrir það. Síðast en ekki síst hvet ég alla til að venja sig á 80/20 regluna því auð­vitað er allt í lagi að leyfa sér af og til. Það þýðir að borða hollan og næringar­ríkan mat 80% af tímanum og leyfa sér 20%. Ef þú fylgir þessari reglu þá er líkaminn í stakk búinn til að takast á við ó­hollustuna.“

„Hollur líf­stíll er lang­hlaup en ekki sprett­hlaup hvað þú borðar hefur virki­leg á­hrif á heilsu þína til fram­búðar. Ég skora á þig að borða rétt,“ skrifar Magnús að lokum.