Landbúnaðarháskóli Íslands fékk býsna rausnarlega gjöf fyrir skemmstu þegar í ljós kom að Magnús Óskarsson, fyrrverandi kennari og tilraunastjóri við skólann, hefði arfleitt hann að öllum eignum sínum. Áætlað er að þær nemi um 200 milljónum króna.
Fjallað er um þetta á forsíðu Bændablaðsins sem kom út í dag, en Magnús lést þann 28. desember síðastliðinn, 93 ára að aldri.
Magnús starfaði við Bændaskólann á Hvanneyri frá árinu 1955. Kenndi við Bændadeild og Búvísindadeild og var tilraunastjóri skólans um árabil. Auk þess yfirkennari Bændadeildar 1972-1982. Hann sat í ýmsum nefndum um landbúnaðarmál og náttúruvernd auk þess að eiga sæti í hreppsnefnd Anda-kílshrepps í mörg ár og sinna fleiri trúnaðarstörfum.
Í frétt Bændablaðsins er haft eftir Ragnheiði I Þórarinsdóttur, rektor Landbúnaðarháskóla Íslands, að gjöfin sé mjög rausnarleg. Það skilyrði fylgir að arfurinn verði nýttur við starfsemi sem tengdist starfi Magnúsar.
„Kvaðir arfsins fela í sér að fjármunina skuli nýta til að byggja upp aðstöðu til rannsóka og kennslu á sviði jarðræktarfræða, umhverfisfræða og landnýtingar. Arfinn má einnig nýta til að efla íþróttaaðstöðu við skólann eða verknámsaðstöðu á Hvanneyri.“