Greinahöfundur hjá Bloomberg segir Ísland vera hinn fullkomna stað til að flýja COVID-19 en flestir ferðamannastaðir eru nú lokaðir vegna heimsfaraldursins. Að sögn höfundarins eru flestir aðrir áfangastaðir heldur ómerkilegir þar sem strangar reglur um samkomur og fjarlægðartakmarkanir eru í gildi.
„Frá upphafi faraldursins hefur Ísland skorið sig út miðað við flest önnur lönd Evrópu með því að hafa fyrirbyggjandi faraldsáætlun tilbúna og haldið sig við hana,“ segir greinahöfundurinn og vísar til umfangsmikilla skimana gegn veirunni hér á landi en hann segir yfirvöld hafa haldið faraldrinum niðri án þess að grípa til strangra aðgerða.
Hann bætir við að Ísland hafi lengi verið þekkt fyrir gullfallegt landslag, norðurljós, hella, og fleira en nú sé það orðið þekkt sem ákveðin dæmisaga um hvernig eigi að bregðast við COVID-19. „Ísland hefur prófað fleiri íbúa miðað við höfuðtölu en nokkuð annað land,“ segir hann enn fremur og tekurfram að árangur hafi náðst við að rekja, greina og einangra öll tilfelli.
Líkt og áður hefur verið greint frá stendur til að opna landið fyrir ferðamönnum á ný í júní þar sem ferðamenn þurfa ekki lengur að fara í tveggja vikna sóttkví við komuna til landsins. Ferðamenn munu þó þurfa að fara í skimun gegn veirunni við komuna til landsins eða skila inn vottorði. Höfundurinn segir það vera lítið gjald til að njóta landsins.
„Á meðan önnur lönd berjast við að snúa aftur úr útgöngubanni, á sama tíma og þau reyna að ýta undir ferðamennsku, þá er það þess virði að fylgjast með Íslandi. Ef lítið land getur greint, rakið og einangrað tilfelli kórónaveirusmits, og endurræst ferðamannaiðnaðinn á nokkra mánaða tímabili, þá er það hægt annars staðar líka.“
The world’s tourism hot spots are gradually reopening, but most don’t look very alluring.
— Bloomberg Opinion (@bopinion) May 16, 2020
Here’s one destination that might turn out to be the perfect coronavirus refuge: 🇮🇸Iceland https://t.co/JuIW28an4B