Neyðarskýli sem Reykjavíkurborg kom á laggirnar fyrir heimilislausar konur sem var opnað í Covid-faraldrinum verður lokað í júlí. Greint var fyrst frá þessu á MBL.
Úrræðið var tímabundið og átti að loka því síðasta sumar, það var framlengt um ár.
Regína Ásvaldsdóttir, forstöðumaður velferðarsviðs Reykjavíkurborgar, segir að verið sé að vinna í að koma konunum í langtímaúrræði.
Konukot verður eina neyðarúrræðið fyrir heimilislausar konur.
Halldóra R. Guðmundsdóttir, forstöðukona Konukots, segir Konukot vera yfirfullt margar nætur. Tólf pláss eru þar í boði.
„Það er allt fullt hjá okkur, ekki á hverri nóttu en stundum er yfirfullt. Það fer eftir veðri og vindum. Nýtingin er náttúrulega óstabíl, sumar eru bara eina nótt og sumar eru alltaf og svo skiptast þær út,“ segir Halldóra.