Margréti Friðriksdóttur, ritstjóra Fréttin.is, var vísað úr flugvél Icelandair í morgun. Starfsfólk Icelandair óskaði eftir aðstoð lögreglu sem fylgdi Margréti úr vélinni. Þetta kemur fram í fréttFréttablaðsins.
Þar segir að Margrét væri á leið til Moskvu, höfuðborgar Rússlands, með millilendingu í Þýskalandi, en grímuskylda er enn í öllu flugi til Þýskalands.
Samkvæmt heimildum Fréttablaðsins kom til átaka vegna grímuskyldu í vélinni en í samtali við Fréttablaðið segir Margrét það bara hluta af sögunni.
„Þær (flugfreyjur Icelandair) byrjuðu með rosalega stæla við mig út af öðru. Ég borgaði fyrir tösku því ég var með dýran farangur með mér, ég er með svona cabin-tösku sem ég hef ferðast með um allan heim. Þær sögðu að það væri ekki pláss fyrir töskuna mína í vélinni,“ segir Margrét.
„Síðan kem ég að sætinu mínu og þá var bara pláss fyrir ofan sætið mitt. Fullt af plássi og ég sagði: Heyrðu það er pláss hérna fyrir töskuna, en þær sögðu nei,“ segir Margrét.
„Svo fóru þær að tala um að það væri grímuskylda og ég sagði bara ha? Er grímuskylda? Ég er ekki búin að heyra um það lengi, ég hélt þetta væri bara búið þetta Covid. En þeim fannst ég vera með rosa vesen og vísuðu mér úr vélinni og ég fékk ekki að fljúga,“ segir Margrét.
Aðspurð segir hún það rétt að lögreglan hafi verið kölluð til, til að vísa henni úr vélinni.
„Þeir áttu ekki til orð yfir þessari framkomu því ég var ekki með læti,“ segir Margrét. „Þær bara ákváðu að ég mætti ekki fljúga. Ég setti meira að segja á mig grímu og sagði: Ég skal þá bara vera með grímuna. En það var ekki nógu gott þannig þær kölluðu bara til lögregluna,“ segir Margrét.
Hægt er að lesa viðtalið við Margréti í heild sinni hér.
