Lögmennirnir þrír sem gættu hagsmuna kærenda í þeim þremur málum sem héraðsdómur úrskurðaði í um helgi fengu 750 þúsund hver, í þóknun fyrir starf sitt. Vinna þeirra hófst eigi fyrr en síðastliðinn fimmtudag þegar reglugerðin tók gildi og lauk síðdegis á páskadag eftir að málin voru flutt í héraðsdómi Reykjavíkur.
Í frétt á visi er vísað til þess þess að í einum úrskurði hafi lögmaðurinn Ómar R. Valdimarsson vakið athygli dómsins á því að hann „hefði varið nánast öllum vökustundum sínum í málið, eða um þrjátíu tímum. Það væri hóflega áætlað auk þess sem vinnan hefði farið fram á einum helgasta tíma ársins þegar flestir væru í fríi frá hefðbundum störfum." Gerði hann kröfu á grundvelli 29,900 króna tímagjalds án virðisaukaskatts. Ætla má að hinir lögmennirnir tveir, Jón Magnússon og Reimar Pétursson, hafi gert svipaðar kröfur en svo fór að þeim var hverjum um sig dæmd 750 þúsund króna þóknun úr ríkissjóði fyrir vinnu sína.
Áður en til málaferlanna kom birti lögmaðurinn Ómar færslu á Facebook-síðu sinni þar sem hann bauð fólki á hótelinu, sem vildi leita réttar síns, þjónustu sína endurgjaldslaust.
Í frétt á vef Fréttablaðsins segir um facebook-færsluna, sem lögmaðurinn hefur nú eytt, að af henni megi ráða að það kunni að vera kostnaðarsamt að leita réttar síns fyrir þá sem eru látnir sæta íþyngjandi aðgerðum í þágu sóttvarna. Svo sé þó ekki, þegar um frelsissviptingu er að ræða. Samkvæmt sóttvarnalögum sé heimilt að bera ákvörðun sóttvarnalæknis um frelsissviptingu undir dómstóla en um slík dómsmál segir meðal annars í lögunum: „Þóknun skipaðs talsmanns varnaraðila og annan málskostnað, þ.m.t. kostnað við öflun læknisvottorða og annarra sérfræðiskýrslna, skal greiða úr ríkissjóði.“
Í fréttinni er þó haft eftir Ómari að „það hafi ekki verið ætlun hans að blekkja neinn heldur hafi honum runnið blóð til skyldunnar þegar fréttir af sóttkvíarhótelinu komust fyrst í hámæli. Hann hafi aðeins viljað vekja athygli þeirra, sem málið var skylt, á að þeir þyrftu ekki að hafa áhyggjur af málskostnaði við að fara í svona mál."
Óhætt er að fullyrða að lögmennirnir þrír hafi unnið vinnuna sína enda tókst þeim að fá dómsúrskurð um ólögmæti sóttvarnaaðgerða heilbrigðisráðherra, en dómari héraðsdóms telur skyldubundna vistun í sóttvarnahúsi hafa farið gegn meðalhófsreglu og jafnræðisreglu. Þá hafi reglugberðarákvæði um vistunina ekki haft lagastoð.
Nú er úrskurðar Landsréttar beðið en gert er ráð fyrir úrskurði þaðan í dag.