Lögmaður Örnu McClure, lögmanns Samherja, hefur ritað Hringbraut bréf þar sem áskilinn er réttur til að bregðast við eftir viðtal á Fréttavaktinni síðastliðinn föstudag við Helga Seljan og Þóru Arnórsdóttur. Tilraunir til að þagga niður í blaðamönnum voru til umræðu í þættinum.
Halldór Brynjar Halldórsson hæstaréttarlögmaður gerir meðal annars í bréfinu þá athugasemd að hlutlægni hafi ekki verið gætt. Ekki hafi verið haft samband við Örnu áður en þátturinn var sýndur þrátt fyrir að vegið hafi verið að henni í þættinum. Engin tilraun hafi verið gerð til að leiðrétta rangfærslur sem fram hafi komið hjá viðmælendum.
„Er óhjákvæmilegt að gera við það alvarlega athugasemd að meðal annars sakborningi í virkri lögreglurannsókn sé þannig veittur óheftur aðgangur til að koma sjónarmiðum sínum á framfæri í fjölmiðli og vega að brotaþola [Örnu, innskot blaðamanns] óhindrað, án þess að sjónarmiða brotaþola sé leitað eða honum veitt tækifæri til að bera hönd fyrir höfuð sér. Er allur réttur áskilinn vegna þessa,“ segir í bréfinu.
Fréttablaðið-Hringbraut bauð Örnu með bréfi í gegnum lögmann hennar að koma í viðtal í gær til að koma sjónarmiðum á framfæri. „Skjólstæðingur minn hefur hingað til talið rétt að halda sig til hlés þar sem virk lögreglurannsókn er í gangi. Mun hún meðan svo er ekki tjá sig opinberlega til að forðast nokkuð sem áhrif geti mögulega haft á rannsóknina,“ segir meðal annars í svari Halldórs Brynjars.
