„Við erum ekki stéttlaust samfélag,“ segir tónlistarmaðurinn Logi Pedro Stefánsson á Twitter-síðu sinni.
Þar gerir hann að umtalsefni frétt sem vakti talsverða athygli í gær, en hún sneri að aðgerðum lögreglu í Garðabæ í gær vegna gruns um að verkamenn sem hér starfa væru með fölsuð vegabréf. Fjórir karlmenn voru handteknir á byggingasvæði í bænum og í frétt Vísis sagði að nýr landamæraeftirlitsbíll hafi komið að góðum notum í aðgerðunum. Í bílnum vegabréfaskanni sem er tengdur við Schengen-upplýsingakerfið og Interpol.
Nokkur umræða hefur verið um þetta á Twitter þar sem aðgerðir yfirvalda eru gagnrýndar. Logi segir til að mynda: „Þú getur arðrænt heilu þjóðirnar, stungið undan skatti, framið siðlausa efnahagsglæpi með tugi milljarða en samt fengið símtal til að heyra hvernig þér líður frá ráðamönnum. Og fyrir allra augum. Við veiðum fátæka verkamenn, bókstaflega veiðum,“ segir hann.
Hrafn Jónsson, pistlahöfundur og kvikmyndagerðarmaður, gagnrýnir þetta einnig.
„Það er ótrúlegt hvað það virðist ómögulegt að hafa hér eftirlit með peningaþvætti, aflandsfélögum, kvótasvindli og ólöglegum atvinnuháttum erlendis, en ekkert mál að fjármagna einhvern fasistabíl sem rúntar um bæinn og í von um að nappa viðkvæmustu hópa þjóðarinnar,“ segir hann.