Logi Einarsson, formaður Samfylkingarinnar, tilkynnti í forsíðuviðtali Fréttablaðisins í dag að hann hygðist ekki gefa kost á sér til áframhaldandi formennsku í flokknum. Landsfundur Samfylkingarinnar er haldinn í haust og því eru margir farnir að velta því fyrir sér hver tekur við af honum.
Kristrún Frostadóttir, þingkona Samfylkingarinnar, hefur verið orðuð við formennsku. Össur Skarphéðinsson kallaði eftir því í vikunni að Kristrún ætti að taka við formennsku sem fyrst.
Kristrún sagði í Facebook færslu á síðunni sinni að hún væri þakklát Loga fyrir störf sín og móttökurnar þegar hún fór að starfa með flokknum.
„Elsku Logi. Einstakur maður í alla staði. Takk fyrir þín störf og takk fyrir að taka svona vel á móti mér þegar ég slóst í för með ykkur í desember 2020. En mikið er ég líka ánægð að við fáum að njóta krafta þinna þrátt fyrir forystubreytingar – það er svo mikilvægt, enda sterkur maður í pólitík,“ skrifar Kristrún í færslunni.
Þótt Logi sé að hætta sem formaður er hann hvergi af baki dottinn. „Ég hlakka til þess frelsis að vinna að mínum pólitískum málum sem fótgönguliði,“ segir hann í samtali við Fréttablaðið.