Þátturinn Lífið er lag er á dagskrá Hringbrautar kl. 20.30 en þættirnir fjalla um stöðu, hagsmuni og framtíðarsýn
eldri borgara á Íslandi en þetta er 5. þáttur af 12 á þessu hausti. Efni þáttanna er mjög blandað en þar er fyrst og fremst upplýsandi
efni um heilsu, lífsstíl, heilbrigði, matarvenjur og ýmis hagsmunamál eldri borgara. í þætti kvöldsins verður m.a. rætt við Ásgeir Theódórs meltingarlækni
um ristilspeglun sem hann hefur stundað hér á landi í hart nær 40 ár. Þá verður rætt við sálfræðing á Heilsustofnun í Hveragerði um núvitund og Þorkell
Sigurlaugsson viðskiptafræðingur fjallar stuttlega um þær skerðingar á kjörum eldri borgara sem oft eru í umræðunni. Undir lok þáttarins ræðir þáttastjórnandinn
Sigurður K. Kolbeinsson Ágúst Guðmundsson leikstjóra sem á að baki langan og glæstan feril. Hann mun m.a. segja frá gerð fyrsta alvöru kvikmyndaverki sem hann stjórnaði
árið 1980 en það var stórmyndin Land og synir. Þúsundir Íslendinga sáu þessa kvikmynd og flesta rak í rogastans þegar Sigurður Sigurjónsson
beindi haglabyssu að hvítum fallegum hesti sem felldur var í bíómyndinni. En var hann felldur í raun? Því svarar Ágúst Guðmundsson
í þætti kvöldsins. Kvikmyndataka var í höndum Friðþjófs Helgasonar.
