Gott pastasalat stendur alltaf fyrir sínu, hvort sem það er heitt eða kalt. Þessi útfærsla er úr smiðju Berglindar Hreiðars okkar sívinsæla köku- og matarbloggara hjá Gotterí og gersemar og er ótrúlegt einfalt og lauflétt að útbúa.
„Þessi útfærsla minnti mig mikið á sesarsalat nema með pasta og pestó að auki, algjörlega fullkomin blanda,“segir Berglind og bætir jafnframt við að þægilegt að sé að útbúa þetta salat í helgarlokin og jafnvel nýta afganga að kjúkling eða öðru léttu kjötmeti frá helginni í þennan rétt.
Pestó pastasalat uppskrift
Fyrir 4
500 g Rigatoni pasta
1 krukka Sacla Basil Pesto (190 g)
2 kjúklingabringur (eldaðar)
200 g beikon
Romaine salat
4 msk. söxuð fersk basilíka
Brauðteningar
Furuhnetur
Ceasarsalat-dressing
- Eldið kjúklinginn og skerið í bita.
- Steikið og þerrið beikonið, gott er að hafa það stökkt og síðan skera niður.
- Sjóðið pasta og sigtið vatnið síðan frá.
- Blandið pestó saman við pastað, saxið salatið og blandið því ásamt basilíku, brauðteningum, kjúkling og beikoni saman.
- Berið fram með ceasarsalat-dressingu og furuhnetum.
Hægt að snæða bæði kalt og heitt, eftir smekk hvers og eins.
Njótið vel.
