„Þegar ekki er hægt að borga alla reikninga þarf að velja úr. Þegar valið stendur um að standa skil á húsaleigu og þurfa svo að sleppa einhverju öðru verður það oft ofan á því án húsnæðis lendir fólk á götunni,“ segir fjölmiðlakonan Lára Ómarsdóttir.
Lára skrifaði hugleiðingu á Facebook-síðu sína í vikunni sem vakti mikla athygli. Vakti hún meðal annars máls á skólamáltíðum barna en Fréttablaðið greindi frá því á þriðjudag að grunnskólar í Reykjanesbæ hefðu sótt um styrk til barnavinafélagsins Hróa hattar fyrir 14 nemendur vegna greiðslu skólamáltíða. Kom fram í fréttinni að loka hefði þurft á tólf áskriftir að skólamáltíðum það sem af er skólaári.
Sigríður Rut Jónsdóttir, formaður félagsins, sagði svo við Fréttablaðið í gær að mikil aukning hefði orðið á beiðnum til félagsins að undanförnu.
„Við erum að fá beiðnir af öllu landinu en sjáum samt svæðaskiptingu í þessu. Það virðist vera þannig að sum sveitarfélög séu betur til þess fallin að klára þessi mál en önnur. En við tökum glöð við öllum þessum beiðnum og erum ánægð með það að geta hjálpað.“
Eins og Lára bendir á í færslu sinni þurfa sumir að velja á milli þess að standa skil á húsaleigu eða húsnæðisláni og einhvers annars.
„Það þýðir að stundum þarf að sleppa því að greiða fyrir skólamáltíðir barna sinna eða aðra líka reikninga og jafnvel sleppa mörgum reikningum. Þegar lítið er milli handanna er þetta því miður veruleiki fólks,“ sagði Lára og bætti við að þetta þýddi ekki að fólk væri vont eða lélegir foreldrar, bara fátækir foreldrar.
„Oft verður mikið tekjutap á heimilum vegna atvinnuleysis. Þá er allt í einu ekki til fyrir öllum reikningum. Það er bara þannig. Því miður finna svo börnin fyrir þessu, vita að þau geta ekki fengið pening í strætó, geta ekki haldið afmæli eða þurfa að sleppa skólamáltíðinni. Það þarf samt ekkert að vera þannig. Samfélagið gæti alveg ákveðið að breyta þessu.“
