Níu af hverjum tíu Íslendingum segja líklegt að þeir myndu þiggja bólusetningu gegn COVID-19 þegar byrjað verður að bjóða upp á hana. Tæplega 6% segja það ólíklegt og rúmlega 4% segja það hvorki líklegt né ólíklegt.
Rétt innan við helmingur landsmanna segir öruggt að hann þiggi bólusetningu gegn COVID-19. Þetta er samkvæmt niðurstöðum nýs Þjóðarpúls Gallup. Flest bendir til þess að bóluefni gegn veirunni verði komið í almenna dreifingu á næsta ári ef allt gengur eftir.
Samkvæmt niðurstöðum Þjóðarpúlsins segja nær þrír af hverjum tíu það mjög líklegt og rúmlega 12% segja það frekar líklegt. Innan við 3% segja öruggt að þau myndu ekki þiggja bólusetningu, rúmlega 1% segir það mjög ólíklegt og tæplega 2% segja það frekar ólíklegt.
Í tilkynningu frá Gallup er vísað í niðurstöður alþjóðlegrar könnunar rannsóknarfyrirtækisins Ipsos, sem gerð var nýlega í 27 löndum víðs vegar um heiminn, en þær benda til þess að almennt myndu um þrír af hverjum fjórum þiggja bólusetningu.
„Þó spurning og svarmöguleikar séu ekki nákvæmlega eins milli kannana virðast Íslendingar vera meðal þeirra þjóða sem eru líklegastar til að þiggja bólusetningu. Af þeim þjóðum sem alþjóðlega könnunin var lögð fyrir eru það aðeins Kínverjar sem virðast líklegri en Íslendingar til að þiggja bólusetningu,“ segir í tilkynningu Gallup.
Marktækur munur var á svörum fólks eftir því hvaða flokk það kysi til Alþingis, en þeir sem kysu Vinstri græn (98%) eru líklegastir til að þiggja bólusetningu. Þar á eftir koma kjósendur Framsóknarflokksins (94%), Viðreisnar (91%) og Sjálfstæðisflokksins og Samfylkingar (89%).