Kristján Þór Júlíusson, sjávarútvegs- og landbúnaðarráðherra, er sá ráðherra í ríkisstjórninni sem flestir eru óánægðir með. Kristján Þór er sömuleiðis sá ráðherra sem fæstir eru ánægðir með.
Þetta er samkvæmt niðurstöðum Þjóðarpúls Gallup.
Flestir ánægðir með Katrínu
Af ráðherrum ríkisstjórnarinnar eru flestir ánægðir með störf Katrínar Jakobsdóttur forsætisráðherra, en rúmlega 59% landsmanna eru ánægð með störf hennar.
Þar á eftir kemur Lilja Dögg Alfreðsdóttir mennta- og menningarmálaráðherra, en nær 54% eru ánægð með störf hennar, en auk þess eru fæstir óánægðir með störf hennar.
Í þriðja og fjórða sæti eru Þórdís Kolbrún R. Gylfadóttir ferðamála-, iðnaðar- og nýsköpunarráðherra og Svandís Svavarsdóttir heilbrigðisráðherra, en um 46% eru ánægð með störf þeirra.
Á hæla þeim kemur Bjarni Benediktsson fjármála- og efnahagsráðherra, en nær 43% eru ánægð með störf hans, þá Sigurður Ingi Jóhannsson samgöngu- og sveitarstjórnarráðherra, en nær 39% eru ánægð með störf hans, og Áslaug Arna Sigurbjörnsdóttir dómsmálaráðherra en um 37% eru ánægð með störf hennar.
Tæplega 35% eru ánægð með störf Guðmundar Inga Guðbrandssonar umhverfis- og auðlindaráðherra, Ásmundar Einars Daðasonar félags- og barnamálaráðherra og Guðlaugs Þórs Þórðarsonar utanríkis- og þróunarsamvinnuráðherra, en aðeins rúmlega 10% eru ánægð með störf Kristjáns Þórs Júlíussonar sjávarútvegs- og landbúnaðarráðherra.
Kristján Þór sker sig úr
Þegar óánægja er skoðuð kemur í ljós að langflestir eru óánægðir með störf Kristjáns Þórs, eða nær 62%. Rúmlega 35% eru óánægð með störf Áslaugar Örnu og Bjarna Benediktssonar, rúmlega 31% með störf Guðmundar Inga, 28% eru óánægð með störf Guðlaugs Þórs, nær 27% með störf Ásmundar Einars og nær 26% með störf Svandísar og Sigurðar Inga.
Þær þrjár sem flestir eru ánægðir með eru einnig fæstir óánægðir með. Slétt 21% er óánægt með störf Katrínar, rúmlega 18% eru óánægð með störf Þórdísar Kolbrúnar og rúmlega 17% eru óánægð með störf Lilju Daggar.
Í Þjóðarpúlsi Gallup er reiknuð út meðaltalseinkunn út frá hlutfalli ánægðra og óánægðra. Katrín Jakobsdóttir trónir þar á toppnum með einkunnina 4,6, Lilja Dögg Alfreðsdóttir er með einkunnina 4,5, Þórdís Kolbrún með 4,3, Svandís með 4,2, Sigurður Ingi með 4,1, Guðlaugur Þór, Ásmundur Einar og Bjarni með 4,0, Áslaug Arna og Guðmundur Ingi með 3,9 og Kristján Þór rekur lestina með 2,9.