Eiður Smári Guðjohnsen er farinn í tímabundið leyfi frá störfum sínum fyrir Knattspyrnusamband Íslands og fékk skriflega áminningu en myndskeið af honum undir áhrif kasta af sér vatni í miðbænum fór í dreifingu fyrir skömmu.
Fjöldi hefur tekið upp hanskann fyrir Eið Smára og er einn þeirra Össur Skarphéðinsson fyrrverandi þingmaður og ráðherra sem birti stöðuuppfærslu um málið á Facebook-síðu sinni. Þar segir Össur að ákvörðun Eiðs um að axla ábyrgð á málinu sé til fyrirmyndar, sem og viðbrögð KSÍ. „Það er pláss fyrir alla og hinir hrösulu verða vitaskuld jafnan að eiga von um upprisu. Allir eiga að gleðjast yfir því,“ skrifar ráðherrann fyrrverandi.
„En hver hefur svo sem ekki pissað í miðbænum öls við pel einhvern tíma á ævinni?“ spyr Össur. Hann segist vona að Eiði gangi vel í framtíðinni, líkt og öðrum sem verður á í lífinu. „Sjálfur er ég alltaf á barmi einhvers konar glötunar er þetta hefur allt reddast hingað til,“ skrifar hann að lokum.
Fjölmargir þekktir blanda sér í umræðuna
Meðal þeirra sem tjá sig undir færslu Össurar er Björgvin G. Sigurðsson fyrrverandi efnahagsráðherra og skrifar: „Vel er mælt - tek undir hvert orð.“
Sósíalistaforinginn Gunnar Smári Egilsson rifjar upp er hann sá Eið eitt sinn spila fótbolta. „Ég sá hann einu sinni á Stamford Bridge með Chelsea og þótt að þar hafi verið stjarna í hverju rúmi var Eiður maðurinn, sá sem leikurinn á einhvern hátt snerist um, sá sem gat breytt öllu. Hann var þarna á toppnum og í hlutverki sem passaði honum fullkomlega. Í viðtölum er hann hógvær, velviljaður og eilítið viðkvæmislegur, virkar á mann eins og það sé ekki til í honum eitt illt bein. Vonandi nær hann sér sem fyrst og blómstrar á ný.“
Geir Jón Þórisson, fyrrverandi yfirlögregluþjónn, segir skrif Össurar góð og „góða kristilega þanka.“ Hann segir að líkt og Jesú eigum við að fyrirgefa.
„Hárrétt, fallega og vel orðað, Össur. Ég pissaði oft og milljón sinnum utandyra undir alvarlega miklu magni af áfengi hér áður fyrr, og svo kom að því að ég henti mér á snúruna og hef hangið til þerris í 22 ár, og er orðinn skraufþurr inn að beini. Þó samt ekki þurrari en svo að ég pissa enn utandyra, ef þörfin er til staðar, sá gállinn er á mér og aðstæður bjóða... Aldrei skal KSÍ eða aðrir móðgunarfíklar stoppa mig í því...“ skrifar lögmaðurinn og smálánakóngurinn Gísli Kr. Björnsson.
Hvað varð um húmanismann?
Hallur Hallson skrifar að hann vonist til þess að þjóðin standi við bakið á Eið Smára. „Eiður Smári hefur glatt okkur & fyllt stolti,“ skrifar hann.
Bjarni Brynjólfsson upplýsingafulltrúi, áður upplýsingastjóri, Reykjavíkurborgar tekur undir með Össuri. „Snilldarpistill. Erum við ekki öll á barmi glötunarinnar. Hvað varð um húmanismann og skilning á mannlegri náttúru undir jökli?“
Lögmaður og margfaldur fyrrum eigandi DV, Sigurður G. Guðjónsson, segir þetta hverju orði sannara hjá Össuri og hann vonast til að „stjarna Eiðs fái að skína sem skjærast hér eftir sem hingað til.“