Fréttablaðið greindi frá því morgun að kanadískur auðkýfingur hefur fest kaup á jörðinni Horni í Skorradal en innan hennar er hið þekkta fjall Skessuhorn. Hyggst hann byggja þar 1.000 fermetra villu og 700 fermetra gestahús.
Fjallið Skessuhorn er bæði þekkt fyrir fegurð sína og sem vinsæl gönguleið fjallgöngumanna. Er það eitt þekktasta fjall Borgarfjarðar og af því dregur héraðsblaðið heiti sitt.
Skurðlæknirinn Tómas Guðbjartsson, betur þekktur sem Lækna-Tómas, er allt annað en sáttur með þessa þróun
„Það er umhugsunarefni þegar erlendir auðjöfrar kaupa íslenskar náttúruperlur eins og Skessuhorn í Borgarfirði - eitt fallegasta fjall landsins. Vonandi virðir hann almannarétt Íslendinga og annarra sem vilja klífa þetta einstaka fjall - og fer ekki að loka svæðinu eins og sumir kollegar hans hafa gert annars staðar á landinu. Það er ömurleg þróun - sem mikilvægt er að berjast gegn,“ skrifar Tómas.
