Undirritun viljayfirlýsingar milli Arion banka og PCC SE, meirihlutaeiganda kísilversins á Bakka í Helguvík, um möguleg kaup á verinu hefur lagst illa í marga.
Einn þeirra sem er ósáttur er Tómas Guðbjartsson hjartaskurðlæknir á Landspítala og skrifaði hann af harðorða færslu á Facebook. Meðal þeirra sem taka undir með lækninum er tónlistarmaðurinn góðkunni Bubbi Mortens sem kemst svo að orði: „loka þessu veri“.
Stakkaberg er núverandi eigandi versins og er félagið sjálft í eigu Arion.
Starfsemi kísilversins var stöðvuð af Umhverfisstofnun eftir tíðar bilanir og fjöldann allan af kvörtunum frá íbúum og því síðan lokað í september 2017.
Tómas segist margsinnis ritað um kísilverið og hneykslast á því. Það hafi verið fagnaðarefni er því var lokað, eftir að íbúar hafi „veikst af útblæstri verksmiðjunnar - sem allir eru sammála um að standi alltof nálægt íbúabyggð.“
„Nú er Arionbanki aftur mættur með adrenalínsprautu sem ætluð er löngu dauðvona verksmiðju. Ástæðan er eflaust sögulega hátt kísilverð um þessar mundir – sem allar líkur eru á að lækki aftur þegar Covid-faraldrinum líkur. Breytingatillögur Stakkabergs á þessu verksmiðjulíki hefur Skipulagsstofnun af óskiljanlegum ástæðum blessað – sem þó réttlætir engan veginn opnun hennar. Þyngst vegur að verksmiðjan er afar mengandi, en á fullum afköstum er talið að hún brenni allt að 150.000 tonnum af kolum á ári. Síðan vilja hvorki íbúar né bæjaryfirvöld í Reykjanesbæ sjá verksmiðjuna – og í staðinn losna við hana - enda bæði heilsuspillandi og ljót.“
Læknirinn spyr hvort Arion banki ætli sér að fara gegn vilja íbúa í nágrenni kísilversins og bæjaryfirvalda einungis af gróðasjónarmiðum. Hann spyr enn fremur hvort þessar fyrirætlanir séu í samræmi við aðgerðir bankans í loftslagsmálum og spyr hver samfélagsleg ábyrgð hans sé.
„Eða er bankinn úlfur i í sauðagæru sem á heimasíðu sinni auglýsir græn gildi og skartar bankastjóra sem nýlega var valinn Markaðsmaður ársins? Bankinn skilaði jú methagnaði í krónum talið og telst varla á vonarvöl. Er ekki kominn tími til að bankinn forgangsraði með umhverfi og heilsu fólks að leiðarljósi - í stað peninga? Þannig banka held ég að flestir vilji skipta við.“