Bandaríski hagfræðingurinn Paul Krugman segir að vendipunkturinn í stríði Bandaríkjanna við kórónuveiruna sem veldur COVID-19 hafi komið þann 17. apríl síðastliðinn.
Krugman, sem hlaut Nóbelsverðlaunin í hagfræði árið 2008, er dálkahöfundur hjá New York Times en í nýjustu grein sinni reynir hann að svara því hvenær stríðið gegn COVID-19 tapaðist og hvers vegna Bandaríkin eru jafn illa stödd og raun ber vitni í baráttunni gegn útbreiðslu veirunnar. Hvergi í heiminum hafa jafn mörg smit greinst og þá virðist faraldurinn geisa allt að því stjórnlaust í mörgum ríkjum Bandaríkjanna.
„Hvenær byrjuðu Bandaríkin að tapa stríðinu gegn kórónuveirunni? Hvernig komum við okkur í þá aðstöðu að fá ekki einu sinni að ferðast til Evrópu?“ segir Krugman í byrjun greinar sinnar.
„Ég held að vendipunkturinn hafi komið þann 17. apríl síðastliðinn, daginn sem Donald Trump tísti: FRELSUM MINNESOTA“ sem hann fylgdi svo eftir með tístinu: „FRELSUM MICHIGAN“.
Á þessum tíma kallaði Trump eftir því að almenningur myndi mótmæla þeim sóttvarnaaðgerðum sem ríkisstjórar höfðu gripið til með það fyrir augum að hemja útbreiðslu veirunnar.
Krugman segir að með þessu hafi hann – og Hvíta húsið – lýst yfir stuðningi við mótmælendur sem voru ósáttir við aðgerðir yfirvalda í umræddum ríkjum. Svo vill til að Demókratar fara með völd í þessum ríkjum og bendir Krugman á að þeir hafi staðið fastir á sínu, þrátt fyrir ákall forsetans. Það hafi hins vegar ríkisstjórar annarra ríkja, undir stjórn Repúblikana, ekki gert.
„Fljótlega eftir þetta afléttu ríkisstjórar Arizona, Texas og Flórída takmörkunum sínum að hluta til,“ segir hann og bendir á að sums staðar hafi ekki verið gerð krafa um að fólk bæri andlitsgrímur á samkomum.“
Krugman segir að ríkisstjórn Donalds Trump beri mikla ábyrgð á stöðu mála. Alvarleg útbreiðsla faraldursins í New York á fyrstu mánuðunum hefðu átt að kenna stjórnvöldum ærlega lexíu.
„Í byrjun júní fór tilfellum aftur fjölgandi í Arizona og Texas. Ríkisstjórar þessara ríkja þverskölluðust við að bregðast við og sögðust hafa fullkomna stjórn á hlutunum. Þann 16. júní birtist svo skoðanapistill í The Wall Street Journal eftir Mike Pence þar sem hann lýsti því yfir að seinni bylgja COVID-19 væri skáldskapur. Miðað við það hvernig ríkisstjórn Donalds Trump hafði brugðist við fram til þessa var ljóst að seinni bylgjan var handan við hornið – sem var einmitt raunin.“
Hann bendir á að staða máli hafi versnað til mikilla muna á undanförnum þremur vikum. Að hluta til megi kenna því um að menn voru of fljótir á sér að aflétta hinum ýmsu takmörkunum en einnig þau skilaboð stjórnvalda til almennings að hættan væri liðin hjá.
Pistil Krugmans má lesa í heild sinni á vef New York Times.