Kristrún Frostadóttir, þingmaður Samfylkingarinnar, reiknar með að upplýsa um lokaákvörðun sína varðandi formannsframboð í Samfylkingunni eftir verslunarmannahelgi.
„Ég er að íhuga alvarlega að bjóða mig fram til formanns, en ég vil fyrst heyra í mínum félögum í flokknum og kanna hvort fólk vilji koma með í þetta stóra verkefni. Ef ég læt slag standa þá geri ég þetta ekki ein,“ segir hún í samtali við Fréttablaðið í dag.
Nafn hennar og Dags B. Eggertssonar borgarstjóra hafa verið nefnd oftast nú þegar styttist í að nýr formaður taki við stjórnartaumunum í Samfylkingunni. Logi Einarsson hefur þegar tilkynnt að hann ætli að láta af formennsku í haust.
Kristrún ítrekar að formannskosningin snúist um málefni og áherslur fremur en einstakar persónur. Hún hafi þó fylgst með umræðunni og þykir vænt um að horft sé til hennar sem mögulegs formanns.
Spurð hvort einu gildi hvaða ákvörðun Dagur B. Eggertsson muni taka um framboð, af eða á, segir Kristrún að ákvörðun hennar snúist fyrst og fremst um hvort hún upplifi samstöðu meðal flokksfélaga um þær hugmyndir sem hún hafi um að styrkja samfélagið.
„Við Dagur erum góðir vinir og vinnum vel saman. Hann mun taka sína ákvörðun út frá eigin brjósti.“
Samfylkingin fékk sex þingmenn kjörna í síðustu kosningunum og segir Kristrún að flokkurinn vilji meira en það.
„Það eru miklir möguleikar til staðar fyrir flokkinn, annars væri ég ekki að íhuga þetta verkefni.“
