Kristján Markús Sívarsson, sem ítrekað hefur komist í kast við lögin vegna ofbeldisbrota, vinnur nú að opnun veðlánastarfsemi hér á landi ásamt unnustu sinni, Birtu Lind Hallgrímsdóttur.
Fréttablaðið greindi fyrst frá þessu í síðustu viku. Kristján sagði við Fréttablaðið að eftirspurn væri eftir veðlánastarfsemi hér á landi og endurskoðandi væri með í ráðum til að passa upp á allt sé löglegt. Hefur vefsíðunni Pawnshop.is verið komið upp þar sem hægt er að nálgast frekari upplýsingar.
„Þú byrjar á því að hringja, svo kemur þú með verðmæti til okkar og við metum hlutinn, við lánum svo allt frá 15 til 50 prósent af verðmæti hlutarins. Allt eftir ástandi. Svo kemur fólk næstu mánaðamót og borgar okkur með 50 prósent álagningu,“ sagði Kristján. Sá sem fær lánaðar 10 þúsund krónur borgar 15 þúsund krónur til baka. Og ef viðkomandi sækir ekki verðmætin þá verður haft samband, að lokum fer hluturinn í sölu.
Kristján er í dag í nokkuð ítarlegu viðtali á vef Vísis um málið þar sem hann segir að allir eigi skilið annað tækifæri. Hann segir að um verði að ræða heiðarlegan „business“ og hann nenni engu kjaftæði.
Kristján hefur sem fyrr segir ítrekað komist í kast við lögin. Hann var til dæmis dæmdur í tæplega fimm ára fangelsi árið 2015 fyrir ýmisleg brot, meðal annars líkamsárásir, fíkniefnabrot og þjófnað. Hann viðurkennir að hafa gert slæma hluti.
„Það er voðalega leiðinlegt ef fólk er hrætt við mig, titlar mig illmenni. Ég hef vissulega framið ljóta glæpi sem maður þyrfti að vera illmenni til að framkvæma. En ég hef verið í mikilli neyslu og rugli,“ segir hann meðal annars í viðtalinu við Vísi.
Í viðtali við Fréttablaðið í síðustu viku sagði Kristján að hann hefði sjálfur viljað veðsetja hluti.
„Litla manninn vantar að geta fengið pening þótt hann hafi ekkert lánstraust, ég hef sjálfur lent í því að þurfa pening strax og koma að öllum dyrum lokuðum,“ sagði hann og lagði áherslu á að ekki yrði tekið við þýfi.
„Ef fólk kemur með slíkt þá verður það tilkynnt til lögreglu. Við fáum kvittun ef þetta eru dýrir hlutir, við viljum sjá að þú eigir hlutinn.“